SO, KOMPIRMADO nga nalakip si Police Lt. Col. Jovie Espenido sa 357 ka mga pulis nga anaa sa listahan ni Presidente Rodrigo Duterte nga gidudahang nalambigit sa pagpakatap sa gidiling drugas sa nasod.
Mismong si Interior and Local Government Secretary Eduardo Año, niadtong Pebrero 14, 2020, ang mikompirmar niini ug mibutyag nga gani girelibuhan na sa iyang puwesto si Espenido isip deputy chief sa operations sa Bacolod City.
Duna man tuoy motuo sa pasangil apan di usab kalikayan nga adunay magduda sa alegasyon.
Kini tungod kay naila ang pangalan ni Espenido tungod sa iyang maisugong pagpakigkombati sa mga dagkong drug personalities.
Niadtong Hulyo 2017, si Espenido maoy hepe sa kapulisan sa Ozamiz City sa dihang gilusad ang maduguong anti-drug operation batok sa pamilyang Parojinog ug ang mga sakop niini nga nabaniog na nga tigpayuhot sa gidiling drugas.
Patay sa maong operations si Mayor Reynaldo Parojinog Sr., iyang asawa nga si Susan, igsuong Provincial Board member nga si Octavio Parojinog Jr. ug laing igsuong babaye nga si Mona.
Siya usab ang nahimong hepe sa Albuera, Leyte sa dihang gipatay ang laing gidudahang drug personality nga si Mayor Rolando Espinosa Sr. sulod sa detention cell sa Nobiyembre 2016.
Tungod sa iyang gipakitang kaisog batok sa mga drug personalities daghan ang mibilib kaniya, apil na ang presidente.
Kini maoy hinungdan kon nganong daghan ang nahibulong ug napugwat sa alegasyon nga siya kasusyo usab diay sa mga tigpayuhot og illegal drugs.
Mahimong dakong tinuod ang pasangil, pero di usab masalikway ang posibilidad nga maniubra kini sa pipila ka mga dagkong opisyal nga nasilo kaniya. Laing anggulo nga angay usab susihon kining giingon nga posibling gilaglag na siya sa ilang grupo tungod kay daghan nang nahibaw-an.