ANG kabulilyaso sa proseso ug ang sayop nga pag-tag sa usa ka pasahero, mao karon ang naghatag og kabalaka ingon man kahadlok sa usa ka pasahero nga gikan sa lungsod sa Badian, human siya maa-an nga gikan sa nasod sa Hong Kong imbes gikan sa nasod sa Taiwan.
Si Guiller Escarpe, uyoan ni Meme Jorolan, parehong taga Badian, wala malipay sa kalangay sa proseso nga gipatuman sa aotoridad sa Mactan Cebu International Airport (MCIA) dihang naabot sila sa Sugbo Miyerkules, Pebrero 12 sakay ang EVA Air gikan sa nasod sa Taiwan.
Karong semanaha lang dihang giapil na ang nasod sa Taiwan nga temporaryong gi-ban sa pagsulod sa nasod tungod sa hulga sa Corona Virus Disease (Covid-19).
Gawas sa gihulagway nila nga public humiliation, daghang fake news ang gipakatap sa maong lungsod nga naghatag og sayop mga impression sa publiko sa maong indibidwal ingon man sa pamilya kabahin sa maong panghitabo.
Si Jorolan usa sa na-tag nga gikan sa Hongkong imbes nga gikan sa nasod sa Taiwan.
Gikuyog ni Escarpe iyahang pag-umangkon og bakasyon sa maong nasod diin nakasulod sila sa wala pa gipatuman ang ban.
“Alas 9:50AM mi naas holding area hapit na mag alas 4 sa hapon wa gihapon aksyon sila kay na busy sila sa pikas room, arrivals gikan sa laing banned countries,” si Escarpe nagkanayon.
Gibutyag niini nga aduna’y sayop sa communication dihang naabot sila base sa arrival card, daw 47 sila ka pasahero ug usa si Jorolan nga gi-hold ug gipaubos sa home quarantine.
Unang nakagawas ang grupo nila ni Escarpe alas 6:30 na sa gabii sa susamang adlaw apan si Jorolan nga kuyog nila, wala pa gipagawas.
Aron mapadali ang paggawas ni Jorolan nitawag kini kang Dr. Urduja Espiritu sa Badian District Hospital aron magpakuha og ambulansya.
Alas 11 na sa gabii dihang naabot ang ambulansya gikan sa lungsod sa Badian paingon sa airport.
“Agree ako sa precautionary measures prevention sa spread, unta sakto sa human basic needs sa holding area, unta aksyon dayon sa background check sa address gisulat sa arrival card,” si Escarpe nagkanayon.
Daw ang management pa sa MCIA ang nitunol nila og pagkaon kay walay budget ang Department of Health niini ingon man ang Bureau of Quarantine.
Tuod man gipaubos sa home quarantine si Jorolan ug gimonitor kini sa Barangay Health Emergency Response Teams (BHERTs) sa Badian apan niangal karon sila si Escarpe tungod sa mga post sa social media nga bisan ang mga BHERT wala mahibaw niining confidentiality unta sa pasyente.
Dili kini ang unang reklamo sa proseso ng gipatuman sa awtoridad tungod kay aduna’y ubang mga Pinoy nga gikan sa ubang nasod nga positibo sa kaso sa Covid-19 nga gibutang sa quarantine facility nga wala’y kuryente ug walay tubig.