DUHA ka mga alarma sa pagpanunggab ang gitubag sa kapulisan sa Dakbayan sa Sugbo, usa ang patay.
Unang alarma sa dunggab nadawat sa kapulisan alas 4:10 sa Sabado sa kaadlawon, Pebrero 15, sa Sityo Ermita Proper,Barangay Ermita, Siyudad sa Sugbo human sa usa ka disko nga gipasiugdahan sa mga opisyal sa barangay agig pagsaulog sa Valentine’s Day.
Si Police Staff Sergeant Joel Perolino niila sa biktima nga si Jonas Osiones, 25 samtang ang suspek mao si Albert Pelayre, 26, silingan.
Matod ni Perolino nga sa wa pa ang pagdunggab ni Pelayre kang Osiones, dunay kalingawan ang barangay.
Sa wa pa ang pagpanunggab, nag-inom pa sila si Pelayre ug kaubanan, apil na si Osiones.
“Nikuha daw ni si Pelayre og kutsilyo tungod kay niana man ning biktima nga nagsultianay daw sila sa iyang uyab nga pagpangdaut ang giestorya kabahin kang Pelayre,” matod ni Perolino.
Giingong nilakaw si Pelayre ug wa magdugay gibalikan si Osiones ug gihansakan sa kutsilyo pipila ka higayon.
Si Osiones daling gidala sa tambalanan, apan gideklarar nga dead on arrival sa doktor.
Si Pelayre nisibat human sa hitabo, apan nilahos sa Waterfront Police Station aron sa pagtahan sa iyang kaugalingon.
Si Pelayre gihatud sa mga personnel sa Waterfront police ngadto na sa Carbon Police Station, diin ubos ang Barangay Ermita ilang jurisdiction.
Si Pelayre nga nahinabi sa Superbalita Cebu niingon nga wa na siya kaaguwanta sa pagsigeg bugalbugal ni Osiones kaniya.
Nagsugod ang ilang panagsungi human siya tabangan unta pagkulata nila ni Osiones ug mga kauban.
“Ang ako ato, Sir, balewala ra gyud to sa akoa. Ang akong gikahipungtan gyud kay akong nabantayan nga mangigi na siya sa akoa. Mubo ra ba nga pagkatawo. Taas pa gali ko niya unya hambugero kaayo,”matod ni Pelayre. Dugang sa suspek nga nagmahay siya sa iyang pagpatay kang Osiones apan nahitabo na, iya kining atubangon.
Kaso nga murder ang atubangon ni Pelayre.
Pipila ka minuto ang milabay, gisundan kini sa laing pagpangdunggab sa Sityo Mahayahay 1, Barangay Calamba, Siyudad sa Sugbo.
Si Police Cpl. Carlo Irizari, nibutyag nga luwas ra ang biktima nga si Alfeo Navarro III human dunggaba sa suspek nga si Ziggy Arzala, 24. / BBT