SUGOD Abril karong tuiga, magkinahanglan na ang Land Transportation Office (LTO) og 15-oras nga theoretical driving course sa matag indibidwal nga mokuha og student’s permit sa di pa hingpit makakuha sa maong permit isip rekisito sa pagkuha og driver’s license.
Apan kining 15-oras, susama ka og nipaubos og seminar diin ipahibawo kanimo ang kaalam kabahin sa pag drive.
Ang maong balaod anaa masukip sa Memorandum Circular No. 2019-2176 sa maong ahensiya.
Matod ni LTO 7 Regional Director Victor Caindec nga sa Abril na kini nila ipatuman, apan kinahanglan nga magpa-accredit ang tunghaan nga gustong mo-offer niini sa publiko.
“Accreditation of driving schools ang process. So far, 21 schools na ang nagpa-accredit. Same concept with medical clinics. Electronic certificates are transmitted to LTO from the accredited schools. We are also in discussions with LGUs for public driving schools which LTO will accredit,” si Caindec nagkanayon.
Dugang ni Caindec nga si Presidente Rodrigo Duterte mismo gusto nga “intelligent drivers” kining anaa sa kadalanan aron usab malikayan kining mga aksidente.
Base sa memorandum, kon makompleto na sa indibidwal ang 15-oras nga theoretical driving course, tagaan kini og certificate of driving course completion.
Susama sa online medical, ang e-certificate, ang tunghaan mismo ang mo-transmit niini sa buhatan sa LTO.
SESSION
Tulo ka sessions ang 15-oras nga theoretical driving course.
Naglakip niini ang Introduction to Driving, Road and Traffic Rules, ug ang labing importante nga Land Transporation Related Special Laws diin sa kasamtangan 13 ka mga balaod sa trapiko ang i-discuss.
Matag session aduna’y tag-lima ka oras.
Wa hinuon gi-regulate sa LTO ang presyo kon pila ning maong kurso, apan aduna’y nagkadaiyang bayrunon ang tunghaan nga magpa-accredit lakip na usab ang instructor niini.
Matag driving school, kinahanglan mobayad og P5,000 isip accreditation fee diin maisyuhan kini og 90-adlaw nga provisional permit sa di pa maisyuhan sa duha ka tuig nga permit gikan sa LTO Assistant Secretary.
Alang sa renewal sa permit, anaa na lang kini sa P3,000.
Samtang anaa sa P1,000 ang accreditation fee sa driving school instructor nga valid sulod sa duha ka tuig.
Kinahanglan usab nga 85% nga mapasar sa driving school instructor ang eksaminasyon niini o theoretical exam.
Mapun-an na unya ang gastohan sa mokuha og student’s permit tungod kay dili lang ang P317.63 nga LTO fee ang bayran sa mokuha niini, mobayad pa kini sa online medical, drug test, ug karon kining 15-oras nga theoretical driving course.
Niadtong 2019, nakatala ang LTO 7 og kapin 40,000 ka mga indibidwal sa rehiyon nga nakalapas sa balaod sa trapiko, doble sa 18,000 lang niadtong 2018. /