Editoryal: Ang tumang kahadlok

Editoryal cartoon by John Gilbert Manantan
Editoryal cartoon by John Gilbert Manantan

SUKAD mitumaw nga dunay tulo ka kompirmadong mga kaso sa coronavirus disease (COVID-19) sa nasod, wa nay lain pang mitumaw. Ang tulo puro mga Chinese national nga gikan sa Wuhan City, China, dapit diin nagagikan ang sakit.

Ang tanan nga mga person under investigation (PUI) mao ang mga tawo nga contacts sa tulo. Dinhi sa Central Visayas, sukad nakompirmar ang tulo ka mga kaso, wa pay bisan usa nga nagpositibo sa mao nga sakit sukad sila gi-quarantine, sa ospital ug ang uban, sa tagsa ka pinuy-anan.

Gihakop sa kahadlok ang publiko. Grabe ang panic buying sa mga face mask, nga niabot sa punto, nga ang mga tawo maglinya na sa gawas sa mga botika ug wholesaler nga tindahan sa medical supplies. Duna gani nasakpan nga

nagpasobra na sa presyo sa face mask. Bisan papel gihimong face mask ug gipamaligya bisan makadaut kini sa panglawas. Naingon gud og fashion statement na ang face mask. Bisan gani sa mga concert o dagkong mga kalihukan diin ang mga tawo magtapok, rekisito na ang mag face mask niadtong mangapil. Maayo gani ang mga simbahan wa mag-require sa mga manimbahay nga magsul-ob og mask kon motambong og misa.

Samtang masabtan ang tumang kahadlok sa mga tawo sa virus nga nakapatay na og 1,000 kapin sa mainland China ug usa dinhi sa Pilipinas, di usab diay maayo nga palab-anan kini og maayo. Hangtod na gud nga kon makakita og mga Insik ug kadtong susama kanila tan-awon nga mga Pinoy, managan o likayan. Nakapasakit ug nakainsulto ang gibuhat sa mao nga mga tawo.

Angay amguhan nga hangtod karon wa pay bisan usa nga nagpositibo sa COVID-19 sa mga giisip nga PUI, gawas niadtong tulo ka Chinese national. Taliwa sa panic buying sa face mask, ang mga manufacturer ug supplier ang nabolahan. Maayo man ang managana tuod, apan di lang sab palab-anan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph