NAGLIBOG ko nganong dugay kaayo mahuman kining proyekto nga drainage diha sa dalan Uldog sa Syudad sa Talisay. Pila pa ka tuig ang molabay usa pa kini mahuman?
Nisuway kog makigpustaanay nga mas mauna og human kining taytayan gikan sa lungsod sa Cordova padulong sa Syudad sa Sugbo kon itandi niining moang proyekto diha sa Uldog.
Ang mga taga Talisay dili mosukol. Kay ang Cordova-Cebu bridge daw sunod tuig na mahuman. Kining sa Uldog, basin og di na mahuman inig tapos sa termino ni Presidente Duterte.
Unsaon man kining ingong mga kontraktor gikan sa Davao nga hawod man bisan og dili kaya. Igo na lang moabang og ekipo nga gubaon.
Ambot, ato na lang ipaagi og pasiaw kay sa magsigi og sapot kada agi sa maong proyekto nga walay kahumanan.
Hinuon, manghinaot ko nga dunay mahimo kining atong pinalanggang batan-ong mayor nga si Samsam Gullas.
Lahi man gud ang batan-on kon itandi sa katiguwangan labi na si Edigul.
Tungaon
Pipila ka mga taga Talisay ang uyon nga panahon na karon nga tungaon sa lolo ni Samsam nga si Kong. Eddie Gullas ang unang distrito sa lalawigan sa Sugbo.
Lahi man gud kon dunay usa ka kongresista nga motutok sa Syudad sa Talisay ug Minglanilla karon kay nagkadako ang maong dapit.
Ang Syudad sa LapuLapu ug Syudad sa Mandaue bitaw nahimo nang lahi nga distrito alang sa kalambuan niini. Kon hisgutan nato ang populasyon ug ang income, sakto na kaayong mahimong usa ka distrito ang Syudad sa Talisay ug Minglanilla.
Ang Syudad sa Naga ngadto sa lungsod sa Sibonga pwedeng lain nga distrito.
Sa maong paagi, mas molambo pa ang tibuok primero distrito.
Kalamposan
Ikadaghan na ko naghisgot nga kon buhaton kini ni Kong. Gullas, moguwa nga ang pagmugnag bag-ong distrito maoy mahimong iyang labing dakong kalamposan.
Nadungog ko kini gikan sa pipila ka mga drayber sa Grab ug taxi nga taga-Talisay nga akong nahinabi. Tabi-an baya kita.
Sa iyang panahon nga nagkongresista, nakamugna si Kong. Gullas og tulo ka mga syudad. Mao kini ang Talisay, Naga, ug Carcar.
Karong nibalik siya sa Kongreso sa katapusang higayon, panahon na nga mosang-at siya og balaudnon nga magtunga sa primero distrito. Ang iyang legacy isip kongresista apil na ang usa ka distrito.
(@anol_cebu sa Twitter)