KINAIYA sa tawo nga buot siya molabaw sa uban. Mga bata padaghanay og duwaan ug padak-anay og bawon. May palabwanay og estorya. Padakoay og mga awto. Pataasay og ihi. Mahimong kalibotanon kaayo kon paandayonan kini. Walay padulngan nga maayo.
Buot pod ni Jesus nga molabaw kita. Miingon siya: “...kon ang inyong pagkamatarong dili molabaw kaysa mga batid sa balaod ug sa mga Pariseo, dili gayod kamo makasulod sa gingharian sa langit”. Laing matang sa paglabaw kini. Unsa man diay ang matang sa pagkamatarong sa mga Pariseo? Nanukad sila sa Balaod ni Moises susama ni Jesus nga nagkanayon: “Ayaw kamo paghunahuna nga mianhi ako aron wagtangon ang Balaod ug ang mga propeta; mianhi ako dili aron pagwagtang, kondili aron pagdala og kahingpitan”.
Giunsa paghingpit ni Jesus ang Balaod? Mihatag siya og tulo ka mga kaso: ang pagpatay, ang pagpanapaw, ang pagpakigbulag, ug ang pagpanumpa. Misugod siya og usa ka pagtulun-an nga binasi sa gitudlo ni Moises. Unya gidugtong niya kini sa kinauyokang rason nga maoy nagtukmod sa maong kalapasan sa balaod, pananglit ang kasuko nga walay pagpugongpugong nga ang pagpatay maoy padulngan. Gipalagman ug gipalapdan ni Jesus Balaod ni Moises. Gidugtong niya ang buhat sa tawo ngadto sa kasingkasing sa tawo. Ligdong ang tawo nga mohimo niini.
May lain pang aspeto. Diha sa kinauyokan sa tawo – nga gisimbolo sa kasingkasing – makaplagan ang Dios. “Ang mata sa Dios didto kanila nga mahadlukon Kaniya,” misulat si Sirac. Tinuoray nga ligdong ang tawo nga modugtong sa buhat ug sa kasingkasing ug, unya, modugtong sa kasingkasing ngadto sa kahadlok sa Dios. Gawas sa “ligdong” gitawag pod kini og “kinaadman”. “Dili kini kinaadman sa kapanahonan...apan...kinaadman sa Dios,” misulat sa San Pablo sa mga taga-Corinto.
Palabwanay diay kining kinabuhing Kristohanon apan usa ka lomba batok sa pagpakaaron-ingnon ug pagkamini. Magsugod kini sa kasingkasing sa tawo nga may kahadlok sa Dios ug mopili sa matarong. Kon dili ta magsugod dinhi, kawang lamang ang mga bulohatong pangrelihiyon ug bulohatong pagpangalagad. Mini ang atong pagpanghatag ug pagtabang sa uban.
Nalabwan na ba nato ang atong mini nga kaugalingon?