DELICADEZA. Kini maoy gustong patamdan sa taga COMELEC sa mga pulitiko sa panahon sa pagbalaan sa semana santa. Sa ato pa di na ta makadungog og tagawtaw sa mga pulitiko sa tibuok semana diin atong handumon ang pagpasakit ni Kristo ibabaw sa krus.
Sama kang Kristo magpu-asa sab ang mga pulitiko. Dili siguro ang pagpuasa sa pagkaon. Magpu-asa sila sa pagsige og pamakak, panglingla, panghaylo ug pagpanaway sa ilang mga kaatbang nga kandidato. Mao sab ni ang panahon nga ilang hinuktukan ang ilang mga gihimo kon nasubay ba ni sa kabubut-on ni Kristo o nasubay sa kagustohan sa yawa.
Busa gilauman karon sa katawhan nga magpakahilom una sila, kon mahimo di magpaduol sa mga tawo aron di masaypan ang ilang presensya nga sila namulitika. Wa tay madunggan ngapulitiko nga mobatbat sa katapusang pito ka pulong. Wa say mga anunsyo nga sila sponsor sa bisan unsa nga pulong nga pagabatbaton.
Galing lang duna may mga pulitiko nga baga sab kaayo og nawong, sama nga dunay mga tawo nga magpasiugda niining siete palabras nga modangop sa bulsa sa mga pulitiko. Mao nga hugot ang akong pagtuo nga daghan gihapong mga pulitiko ang mopapel sa pagpasakit ni Kristo.
TIME BOMB
Ang presensya ni Ruben Ecleo sayo ning semanaha dinhi sa Sugbo nakapahinumdom nako niadtong ako siya nga na-interview sud sa iyang kuwarto sa Chong Hua Hospital. Nahitabo ni human nga siya nakagawas sa prisuhan tungod sa gihambin nga balatian sa kasingkasing. Gilalim ka og walking time bomb nga paghulagway sa iyang balatian, mao nag-iyahay og diskarte ang mga reporter sa telebisyon unsaon nga siya ma-interview ug makuhaan og video sud sa tambalanan. Ambot og nganong nitugpa nako ang suwerte nga makaabot sa 10th floor nga maoy iyang nahimutangan nga unta guardiado man kaayo ang ospital.
Nahibulong bitaw ko nganong naabot mi sa iyang kuwarto nga way bisan usa nga mibabag sa among agianan. Mao pay pagkaukay sa mga bantay sa diha nga nanganaog nami human sa interview.
Ug ang maong interview uban sa iyang video maoy labing una nga migawas sa TV sukad nga siya nalandig sa tambalanan. Human
niadto wa na gyud ni masundi pa, kay misamot kahugot ang iyang siguridad hangtod nga nakagawas siya sa tambalanan.
MOPASO
Mga pahalipay alang sa tanan nga mogradwar ug sa mga migradwar na gikan sa kolehiyo og high school. Sa mga honor student di lang katumanan sa pangandoy ang pasidungog nga inyong dawaton, kundili pagpalig-on kini sa inyong kabut-an , kakugihan ug kamatinud-anon isip mga tinun-an. Mao nga si agaw Mercy Nadela Gomez way kabutangan sa iyang kalipay human ideklarar nga Cum Laude ang iyang anak nga si Raizel Nadela Gomez, nga migradwar sa kursong BS Management Accounting sa University of San Carlos. Congratulations Gaw!