PARAT sa panghimaraot mao’y natilawan sa nagpalami atol sa Semana Santa didto sa Santa Fe, Bantayan sa niaging tuig.

Kahinumdoman nga kuwang na lang makapanguros si Gov. Gwen Garcia dihang iyang nahibaw-an nga gipahigayon didto ang usa ka “bikini show.”

Nanghinaot si Anna Carla Rama Gonzalez, usa sa atong tigbasa ug higala sa Facebook, nga badlungon ug pugngan sa Capitol ang pagpadayon sa uban pang pasiaw didto. Kabahin sa ipahigayon nga bayle kun disco atol sa pagsaulog sa Semana Santa didto sa Bantayan, wala intawon mahimutang si Gonzalez.

Click here for Election 2010 updates

Bisan pa sa kasagrado niining kasumaran sa pag-antos ug kamatayon ni Kristo bugti sa pagtubos sa kasal-anan sa kalibutan, hagbay rang nabaniog kining maong kalingawan sa Bantayan. Ug sama sa naandan, binuligan kining maong kalihukan sa mga dagkong  telecommunications companies ug uban pang corporate sponsors.

Sumala pa sa mulo ni Gonzalez, salawayon kining maong lanog nga kisaw diha sa palibot sa mga beach resorts sa Bantayan. Angay kuno kining hunungon kay makatugaw. Dakong surambaw kini sa mga molupyo sa isla ug uban pang dumuduong sa Bantayan aron unta makapahulay gawas sa pangindahay nga makabaton og kahilom alang sa pagpalandong sa gidangatan ni Kristo.

Panahon kuno kini sa pagpatuyang sa mga sungayan. Gawas sa waldas nga kabanha (“very, very loud with very huge speakers,” sumbong pa ni Gonzalez), makalilisang pod ang kundat sa mga malapason.

Gawas sa pag-alindasay taliwala sa alingugngog, kurat pa gyud ang gimok sa mga kawatan nga nagpanilap sa paghugop sa  katawhan diha sa Bantayan atol sa Semana Santa. “We couldn’t sleep & there are thieves everywhere,” asoy pa ni Gonzalez. “After one disastrous & horrific Holy Week there, never again!”

Magbaha pod kuno ang basura diha sa baybayon, ug ang nakaparat pod kay nagpasad sab ang gipanglabog nga mga botelya sa ilimnon nga makahubog diha sa dagat. Ug sa pagdagsa sa mga bakasyonista sa Bantayan, dayag na lang nga maaghat pod ang mga beach resorts pagpataas sa bayranan didto (“3x the cost more than the normal fees.”)

Ug kay dayag nga pipila sa taga-Bantayan ang mabulahan gumikan sa nagkadaiyang patigayon sa pista, dili lisod sabton kon nganong wa’y imik ang uban nila bisan pa sa tigaw ug uban pang tinunto. “I understand that the people of Bantayan refuse to complain as it is the only time of the year they earn a lot,” sigon pa ni Gonzalez, “but perhaps other events can happen such as cycling races, fun runs, and skim boarding” ug uban pang kalihukan pagpalambo sa turismo nga dili makadagmal sa kahimtang sa kalikupan. (geemyko@gmail.com)