DUHA ka mga kaso sa pagpamusil natigayon sa probinsya sa Bukidnon.
Unang insidente nahitabo Pebrero 13, mga alas 10:30 sa gabii sa Sitio Bayong, San Jose, Quezon, Bukidnon.
Ang biktima nga giilang si Michael Sepulvida, 14, usa ka out of school youth ug residente sa dapit.
Sa imbestigasyon sa kapulisan sa Quezon Police Station nasuta nga nagmaneho ang biktima sa iyang motorsiklo dihang usa ka wala mailang lalaki ang mi-atang ug gipusil makaduha ka higayon.
Nakadagan ang biktima taliwala nga samdan paingon sa ilang puloy-anan hinungdan natabang sa pamilya ug gidali og dala sa balay tambalanan sa Maramag, Bukidnon.
Pagka alas 11:30 sa gabii laing biktima na usab ang samdan nga natigayon sa National Power Corporation (NAPOCOR) Channel sa Maramag, Bukidnon.
Ang biktima giilang si Marlon G. Malunes, 46, minyo, empleyado sa Crystal Sugar Milling Company Incorporated, nga nahimutang sa P-9, North Poblacion, Maramag, Bukidnon ug residente sa P-9B, North Poblacion, Maramag, Bukidnon.
Padulong unta sa iyang panggabii nga duty ang biktima dihang gibabagan sa wala mailang suspetsado ug gipusil.
Dali kining gidala sa Bunidnon Provincial Hospital sa Maramag.
Ang duha pulos anaa na sa luwas nga kahimtang karon panahona.
Giimbestigahan sab karon sa kapulisan kung susama lang ba gihapon ang suspetsado sa unang pagpamusil nga nahitabo.