MAS nitam-is pa ang Valentine's day sa 97 ka paresan human nga nagbinayloay sa ilang mga "I do" atol sa mass wedding nga gipahigayon sa duha ka mga Barangay sa dakbayan sa Cagayan de Oro.
Gawas nga libre kini nga kasal sa 97 ka paresan gi-andaman usab sila og 97 ka libre nga litsong baboy, cake, ug wine.
Anaa sa 61 ang gikasal sa Mt. Carmel Parish sa Carmen ug 36 sa Macabalan sa simbahang Katoliko ug IFI.
Anaa sa 97 ka paresan sa mga dugay na nga nag-ipon ug wala makasal ang gitabangan sa lokal nga kagamhanan sa siyudad labi na sa Barangay Carmen sa pagpangulo ni Kapitana Lorna Uy inabagan usab ni Vice Mayor Kikang ug sa amahan nga si Kongresman Rolando Klarex Uy diin tinuig na nila kini nga gasa matag valentine's day sa ilang katawhan sa maong Barangay ug sa mga nidangop kanila.
Sa pakighinabi kang Lorna Uy gibutyag niini nga tinuig na kini nga kalihokan ug giingong bisan nga ginagmay kinasingkasing nila kini nga gitunol alang sa mga gipangkasal.
Gi-aghat usab niini ang mga wala pa nakasal nga modangop kanila aron nga matabangan sa proseso ug makasal.
"Akong gi aghat ang magtiayon nga nag ipon-ipon pa hangtod karon nga pagsulti lang kamo o duol kamo kanamo kung unsa inyong suliran kay nahibaw- an ko nga ang inyong problema ang bayrunon sa simbahan kay dako kuno og bayrunon so duol lang kamo kay atong masabot man nato ang pari, atong mahangyo kung wala kamoy ikahimo gayud kami andam sa pagtabang kaninyo," pahayag ni Uy.
Dako usab ang pasalamat sa mga nakabenepisyo niini nga programa tungod kay gawas nga libre, libre pa ang handa sama nalang ni Jomary Butalib.
"Pasalamat gyud mi nila kay nalibre among kasal, naa pa gyud litsong baboy, ug cake," pahiyumon nga pahayag ni Butalib.