MAG-ATUBANG og tulo ka mga kaso ang pulis human giingong lango sa ilimnong makahubog ug nanghasi, nangbastos ug nanion atol sa Valentine's Day sa Jakkos Grill, Regatta Boulevard, Upper Carmen ning siyudad sa Cagayan de Oro.
Hingpit na nga napasaka ang kaso batok kang PCapt Calvin Nario Placer, nadestino sa CARAGA apan kasamtangang nag-schooling sa Regional Training Center (RTC).
Gibutyag ni PMaj Jelesis Teves, hepe sa Police Station 4 (PS4) sa Carmen nga napasaka na ang kasong
grave threat, physical injuries ug acts of lasciviousness.
Kahinumdoman nga unang nagtagay sa ilimnong makahubog ang suspek ug gani base sa manager nga halos hapit nahurot niini ang usa ka botelya nga whiskey.
Nasayran nga ubay-ubay ang nagreklamo batok sa suspek ilabi na ang 20 anyos nga dalaga nga iyang gigunitan ang kamot ug gihilam pa ang kilid duol sa iyang dughan.
Giingong gibira ug gilubag sa suspek ang kamot sa dalaga ug gisundan pa kini sa comfort room ug gisulayan sa pag-ali sa dihang paggawas na sa maong pansayan.
"Nakita niya ning si Crizzia medyo tingale naibog siya, gusto siya magpaila -ila and then gani base sa statement nga gihawiran daw kuno iyang kamot medyo something nga gi grab daw so medyo nag react tingale ni ang babaye mao to nga medyo nasuko pud kini ang maong pulis,dadto nahitabo ang pagpanion, " matud ni Teves.
Gihulga usab sa suspek ang laing tulo ka mga biktima diin usa niini ang manager nga si Glenn ug gitionan pa sa armas ug gikulata.
Gibutyag ni Teves nga posibleng nagsumikad ang maong ka agresibo sa suspek sa dihang nagdumili ang babaye sa buot niining maong suspek.
"Taas og posibilidad nga kato gyud bayhana maoy nakapa trigger niya, mao to'y hinungdan sa iyang agresibo nga naglagot siya or mao to iyang pagpani-on," matud ni Teves.
Nasayran nga nisibat pa kini human sa panghitabo ug gani nakabangga sa laing biktima nga sakay sa bisikleta paingon sa Patag ug iya gihapon nga gisibatan apan dili na kini pursigedo nga mopasaka og kaso ug makig-areglo nalang sa mga balayrunon sa naangkon usab niini nga mga gasgas.
Nasikop kini pinaagi na usab sa mga otoridad nga niresponde sa panghitabo.
Pabilin usab nga nagpakahilom ang nahisgutang suspek.