UBOS sa administrasyon sa atong presidente Rodrigo Duterte mao kini ang pinakadakong isyu karong panahona. Una, unsa gyo'y dakong katarungan kung nganong dili na i-renew ang prangkisa sa Alto Broadcasting System-Chronicle Broadcasting Network (ABS-CBN) nga gipanag-iya sa ikatulong henerasyon sa mga Lopez.

Bisan og unsaon nato og analisar kini, adunay pagka-personal, pero, bisan kinsa kanato og kita’y buhatan sa ingon niini, normal lang sa tawo nga masuko bisan og ikaw ug ako, nga nagbayad og P2.8 milyon para sa usa ka political nga ads sa television.

Apan, wala gipagawas sa ABS-CBN duha ka semana una moabot ang 2016 nga lokal ug nasyonal nga eleksyon, mao nga gisabot nato ang gibati sa atong presidente kay tawo lang kita.

Karon ari kita sa panig sa ABS-CBN klaro ug bistado na nga duna sila’y kandidato nga gidapigan, tungod kay si Mar Roxas asawa man niya ang usa ka babaye nga anaa sa ABS-CBN nagtrabo nga mao si Korina Sanchez.

Ang pangutana, unsa man ka tinuod nga wala nila gipagawas ang political ads ni Digong? Ug kung inyong mahinumdoman sa katapusang usa ka semana una moabot ang eleksyon, ang ilang gipagawas mao ang political ads nga gibayaran daw ni Senador Antonio Trillanes ang pagdaut sa kandidatora ni PRRD sa mga patay dinhi sa siyudad sa Davao sa iyang pagka-mayor, ug gigamit pa gyud ang menor de edad sa maong political ads.

Ang atong gikatingad-an nganong tikom-bibig man ang ABS-CBN niining isyuha?

Niadtong layo-layo pa kining bulan sa Marso 2020, kanunay giyawyaw ni PRRD ang iyang kasuko niini nga network sa bisag asa nga okasyon nga iyang tambungan, ug nganong wala man dayon nila hilota kining maong problema?

Kongreso tuod ang adunay katungod nga ma-renew ang maong prangkisa, pero, sukad sa kasaysayan sa nanglabay'ng presidente sa atong nasud, ma-impluwensyahan gyod sa executive ang legislative ug judiciary, mosugot kita ug sa dili.

Karon ngari sab kita sa pangutana, husto kaha nga ingon ini kabug-at ang silot sa ABS-CBN ang pagkansela sa ilang prangkisa tungod sa ilang gibuhat? Mga lungsuranon, kamo ang magpagawas sa inyong tagsa-tagsa ka opinyon.

Sa pikas nga bahin sa laing isyu, gikomperma na ni sa tigpamaba sa pangulo nga si Salvador Panelo nga gipadala na sa atong presidente ang letter of termination sa Visiting Forces Agreement (VFA).

Ang dili lang maayong paminawon kung mao gyud kini ang dugokan, tungod lang kay gikansela sa Estados Unidos ang visa ni Senador Ronald “Bato” Dela Rosa?

Unsay tubag ni Presidente Donald Trump sa dihang gipangutana siya niining isyuha?

“I don’t really mind if they would like to do that, it will save a lot of money," diin buot ipasabot dili sila ang angay mabalaka kung wagtangon ang VFA, kita ang angay mabalaka tungod kay depensa kana, kita unta ang maka-benepisyo, dili ang Amerika.

Matud pa ni Panelo, gusto na kitang mag-independente kung dili karon kanus-a paman diay kuno? Ang pangutana, sure ka Mr. Panelo sir? Nga kaya na nato nga mag-independente? Kamo, husto na ba ang panahon nga mag-independente ang atong nasud sa Pilipinas?

Ang usa ka independente nga nasud, kompleto sa buhatanan og mga high-powered firearms, adunay submarino, kahimanan sa iggugubat sa kawanangan ug kadagatan, ang pangutana karon, naa ba kita niini nga atong ipatigbabaw nga kaya na nato nga mag-independente? Oh my God kaloy-i kami.