DIGOS CITY -- Hugtanong gibantayan sa mga opisyal sa City Agriculture Office (CAO) nga di makasulod sa dakbayan ang mga baboy o mga produkto sa karne niini pinaagi sa gibutang nga mga checkpoints sa entradang bahin sa siyudad.
Human gilagdaan ni Mayor Josef Cagas ang Executive Order 0001 series of 2020, nga nagmando sa temporary ban sa mga baboy ilabi pa kun gikan sa Sulop, Davao del Sur, Davao Occidental ug uban pang dapit nga apektado sa African Swine Fever (ASF) gipatuman na ang taas nga alerto.
Aduna sab checkpoint sa Barangay Colorado aron bantayan nga di makalusot ang mga baboy gikan sa ubang dapit.
Usa sa hugot nga gibantayan sa mga otoridad mao ang mga bukag-bukag nga nagakarga og mga baboy gikan sa ubang dapit aron ipalusot sa mga merkado.
Gipaneguro sa lokal nga gobyerno nga di makalusot sa ilang merkado ang mga karne gikan sa mga dapit nga kontaminado sa ASF.
Gikinahanglan sab nga aduna’y Veterinary Health Certificate, Animal Inspection Permit ug shipping permit ang mga baboy una ihawon sa slaughter house o makasulod sa dakbayan.
Kinahanglan kumpiskahon sa Task Force ang mga baboy nga gikan sa mga lugar nga adunay ASF ug pagapatyon gilayon kini.
Nanawagan sab ang mayor ngadto sa publiko nga ipaabot gilayon sa ASF Task Force o kaha sa City Veterinary Office kun adunay mga baboy nga mangamatay sa bisan asang barangay sa dakbayan. (OBD)