DAVAO DEL SUR -- Hugtanong nagpasidaan ang Davao del Sur Police Provincial Office (DSPPO) ngadto sa publiko nga likayan ang pagpakatag og fake news kabahin sa Corona Virus Disease 2019 (Covid-19).
Sumala ni Police Colonel Alberto Lupaz, officer-in-charge sa DSPPO, nga angayan likayan sa katawhan ilabi pa sa mga netizens ang pagpakatag og fake news batok sa Covid-19 sanglit mahimo silang mapadlak sa bilanggoan.
Niadtong Miyerkules, Pebrero 12, mismong ang Philippine National Police (PNP) ang nagbahad sa publiko nga apil sa mahimong mabilanggo ang mga mo-share og mga fake news diha sa social media.
Matod sa mga otoridad nga adunay silot ang pagmugna sa fake news og pagkabilanggo gikan sa unom ngadto 12 ka tuig, subay sa Republic Act No. 10175 kun balaod sa Cybercrime Prevention Act of 2012.
Ang mga posibleng kalapasan nalatid sa Section 6 kun Unlawful Use of Means of Publication and Unlawful Utterances.
Apil sab niini ang paglapas sa Presidential Decree No. 90 (Declaring Unlawful Rumor-Mongering and Spreading False Information) o posibleng bayolasyon sa tinubdan sa fake news.
Di pa dugay, usa ka bay tambalanan sa dakbayan sa Digos ang nagpagawas og opisyal nga pahayag nga wa’y kamatuoran nga aduna’y na-confined sa ilang ospital nga pasyenteng aduna’y Covid-19.
Mikatap sa social media ang pekeng balita hinungdan nga naalarma ang mgaa tagdumala sa tambalanan.
Hinuon, mihimo na og lakang ang PNP Anti-Cybercrime Group aron subayon ang mga nagpakatag og mga fake news kalabot sa Covid-19 sa lukop nasud. (OBD)