COTABATO CITY -- Personal nga atraso o rido ang motibo sa pagpamanhig sa usa ka sakop sa Karancho alas 2:45 sa hapon, Pebrero 15 ning siyudad.
Giila ang biktima nga si Ismael Ampatuan Akbar, 37-anyos, minyo ug molupyo sa Barangay Bagua 2, Cotabato City.
Matud ni Cotabato City Police Director Colonel Portia Manalad nga samtang sakay ang biktima sa iyang motorsiklo uban ang panon sa mga sakop sa Karancho sa Barangay Rosary Height 6 sa dakbayan, apan kalit lang mibutho daplin sa kalsada ang duha ka wala mailhing tawo ug gipusil kini gamit ang kalibre .45 nga pistola.
Natumba ang gisakyan nga motor ni Akbar ug naligo kini sa iyang kaugalingong dugo.
Abtik sab nga miikyas ang mga namusil sakay sa laing motor paingon sa hilit nga dapit sa siyudad.
Wala sab mamay-ungan sa mga kaubanan ni Akbar ang mga namusil nga pulos sab naka-helmet.
Patay on the spot ang biktima nga naigo sa bala sa iyang likod ug ulo.
Sa kasamtangan ang kapulisan sa Cotabato City ang padayon nga nag-imbestiga sa pagpamusil-patay sa biktima. (Edgar Fuerzas)