KIDAPAWAN CITY -- Patay ang usa ka taas nga lider sa New People’s Army (NPA) sa engkwentro sa militar ug kapulisan alas 12:25 sa udto niadtong adlaw nga Sabado sa probinsiya sa Cotabato.
Giila ang napatay nga si Juanita Tacadao alyas Kumander Isay/Maring, 1st Deputy Secretary sa Guerilla Front ALIP Far Southern Mindanao Regional Committee.
Gibutyag ni Cotabato Police Provincial Director Colonel Maximo Layugan nga nagpahigayon og law enforcement operation ang Makilala Municipal Police Station ug 39th Infantry Battalion, Philippine Army sa Sitio Lacobe, Barangay Malabua, Makilala, North Cotabato.
Target unta nga isilbi ang warrant of arrest batok kang Tacadao apan nakamatikod ang mga NPA ug nanukol sa raiding team.
Milungtad sa lima ka minutos ang sinukliay og mga bala tali sa duha ka pundok hinungdan sa kamatayon ni Tacadao.
Nakaipsot sab ang upat ka NPA nga kauban ni Kumander Isay nga mga samaron.
Kahibaloan nga si Tacadao dunay warrant of arrest nga gi-isyu ni Judge Magnolia Velez sa 11th Judical Region Branch 20 sa Digos City, Davao del Sur gumikan sa kasong murder lakip na Robbery with Violence Against Intimidation of Person nga gi-isyo sab ni Judge Jose Tabosares sa 12th Judical Region, RTC 12 Branch 23, Kidapawan City.
Narekober sa payag-payag nga gitagoan sa grupo ni Tacadao ang usa ka M14 Rifle, usa ka caliber .38 revolver, usa ka anti-personnel Improvised Explosives Device, mga bala ug mga kagamitan sa paggama og bomba.
Anaa karon sa usa ka punerarya sa Makilala Cotabato ang patay nga lawas ni Tacadao samtang padayon nga gilutos sa mga awtoridad ang mga NPA nga naka-ikyas sa operasyon. (Edgar Fuerzas)