Cafgu detachment gibombahan sa BIFF

COTABATO CITY -- Nakugang ang mga sibilyan sa mga dagkong buto sa hinagiban alas 11:45 sa gabii Pebrero 15 sa probinsya sa Maguindanao.

Sa taho gikan sa Maguindanao Police Provincial Office nga sunod-sunod nga gipabuthan sa mga armadong grupo ang outpost sa mga sakop sa Citizen Armed Forces Geographical Unit (Cafgu) ilawom sa 38th Infantry Battalion Philippine Army sa Mamasapano utlanan sa Shariff Saydona Mustapha, Maguindanao.

Upat ka mga bala sa 60 mm mortar ang gipabuto sa gikatuohang mga miyembro sa Bangsamoro Islamic Freedom Fighters (BIFF) sa posisyon sa Para-Military Troopers.

Igo lang milapas sa outpost ang mga eksplosibo nga didto miigo sa mga bakante nga luna.

Mibalos sab ang mga Cafgu sa pagpabuto punting sa gilubluban sa mga rebelde nga abtik nga nanibat sakay sa tulo ka bangka nga de motor paingon sa Liguasan Delta.

Walay naangol o napatay sa mga Cafgu samtang dili matino sa BIFF ilawom sa grupo ni Kumander Kagi Karialan.

Sa kasamtangan nagpadayon ang manhunt operation sa mga sundalo ug Cafgu batok sa BIFF sa Maguindanao. (Edgar Fuerzas)