SUPERBALITA DAVAO

Negosyante, gitumba

ISLAND Garden City of Samal, Davao del Norte -- Wa na matabang ang kinabuhi sa usa ka negosyante ug nabugtoan sa iyang gininhawa human pusila sa wala mailhing mamumuno didto sa Sitio Kabukiran, Barangay Miranda, Babak District, Island Garden City of Samal (Igacos) alas 8:45 sa gabii, niadtong Sabado, Pebrero 15.

Ang biktima mao si Joel Torio Romero, 47-anyos, negosyante, minyo ug molupyo sa Babak Homeowners Association, Sitio Kabukiran, Barangay Miranda, Babak District, Igacos.

Base sa inisyal nga imbestigasyon sa kapulisan sa Igacos PNP, ang biktima nagsakay sa gimaneho niining motorsiklo gikan sa sabungan sa nahisgutang dapit.

Dihang pag-abot sa dapit diin asa nahitabo ang krimen, atubangan sa usa ka vulcanizing shop, duha ka wala mailhing mga armado ang mipusil kaniya sa makadaghang higayon tumong sa nagkadaiyang parte sa lawas nga miresulta sa hinanaling kamatayon.

Human sa krimen ang mga mamumuno daling nanibat padung sa wala masayring direksyon sakay sa usa ka motorsiklo.

Narekober gikan sa crime scene ang tulo ka basiyo ug usa ka balinis sa gituohan .45 kalibre nga armas.

Gikabutyag nga ang biktima alegasyong nalambigit sa ilegal drug activities ug usa sa mga mitahan na kaniadto sa Babak Police Sub-Station.

Ang patay nga lawas sa biktima gipahiluna na sa iyang pamilya didto sa Montano Funeral Parlor sa Barangay Villarica, Babak District, Igacos.

Sa kasamtangan ang kapulisan sa Igacos PNP padayong naghimo og makuti nga imbestigasyon aron masayran ang tinuod nga motibo sa krimen ug aron maila ug masikop ang mga mamumuno.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph