NIADTONG Martes, Pebrero 11, gipadala sa gobyerno sa Pilipinas ang notice of termination sa Visiting Forces Agreement (VFA) sa US Embassy sa Manila. Ang termination mo-take effect human sa 180 ka adlaw nga withdrawal period.
Ang VFA giaprobahan sa Senado niadtong 1999, walo ka tuig human gibasura sa mga senador ang extension sa US bases agreement. Ubos sa VFA, wa nay mga base militar ang Estados Unidos sa Pilipinas apan gawasnon silang moanhi sa atong nasod alang sa mga joint military exercises.
Gisupak ang VFA sa mga militanteng pundok sa atong katilingban tungod kay ang tanan sa kasabotan pulos pabor sa Estados Unidos. Apan kay giaprobahan man sa Senado, wa silay mahimo.
***
Gidayeg ni Jose Maria “Joma” Sison, founder sa Communist Party of the Philippines (CPP), nga tua sa magbase sa Utrecht sa The Netherlands, ang gibuhat ni Presidente Rodrigo Duterte.
Matod niya, si Presidente Duterte hayan nga maoy mahimong “greatest president” sa Pilipinas kon iyang ipadayon ang pagpangusog sa national sovereignty ug territorial integrity sa Pilipinas uban sa economic ug social reforms nga gidemanda sa communist movement sud sa milabay nga 50 ka tuig.
Pero unsa man ang mahitabo kon makalingkawas kita gikan sa mga gaway sa Estados Unidos apan unya gapuson kita sa mga gaway sa China nga karon nag-atubang sa dakong krisis sa COVID-19 nga nikalas sa kinabuhi sa liboan ka mga tawo ug nakatakboy sa libu-libong mga tawo?
***
Di makuwestiyon nga si Presidente Duterte adunay political will. Kinsay presidente nga nakaputol sa VFA? Siya ra. Kaniadto, ang imahen sa Pilipinas mao nga kita itoy-itoy ra sa Amerika.
Si Presidente Duterte ra ang nakaingon ug nakaluwat sa Amerika nga di na kita magpaitoy-itoy pa. Wagtangon ang VFA nga pabor kaayo sa mga Amerikano. Malipay niini kadtong supak sa VFA.
Ang nakaparat, matod pa niadtong supak sa VFA, mao nga di ba kaha kita mahimong itoy-itoy sa China. Mag-agwanta lang ta sa corona virus nga ilang ikadalit.