GIDAKOP sa kapulisan sa lungsod sa Dumanjug niadtong Sabado sa udto, Pebrero 15, tungod sa duha ka binuhat sa pagpanapaw.
Si PMaj. Ardioleto Cabagnot, hepe sa Dumanjug Police Station, niila sa dinakpan nga si Romelyn Teleron, 38, molupyo sa Barangay Liong ug ang kabit niining batan-on nga si Michael Steve Niño Singson, 26, ug molupyo sa Barangay Tubod-Bitoon sakop sa samang lungsod.
Matod ni Cabagnot, usa ka Michael Teleron, 42, bana sa babaye, nangayo og pakitabang sa ilang buhatan human nga nasakpan ang asawa niini kuyog sa gikaipon nga nagpuyo sa usa ka balay sa Liong.
Atol sa operasyon, gipang dakop ang duha sa mga pulis kinsa mao usab ang nakasaksi sa duha nga nagkuyog sa usa ka pinuy-anan.
Dugang ni Cabagnot, nahibaw-an sa bana nga ang maong lalake ug ang iyang asawa kauban sa una sa trabaho ug gituohan niini nga didto nagsugod ang ilang relasyon.
Giingong milarga sa kaulohan ang iyang asawa ug uwahi na nga nahibaw-an nga miapas ang maong kabit ngadto na sa iyang asawa kinsa didto nagpadayon ang ilang relasyon.
Nasayran nga nagkasinabot ang mga ginikanan sa lalake ug ang bana sa maong babaye nga mibarog nga reklamante sa asawa.
Si Michael, nahinabi sa Superbalita Cebu, niingon nga kapin usa na katuig ang milabay nga ang iyang asawa nagbinuang sa ilang kaminyuon.
Dugang ni Michael nga niadtong Septiyembte sa milabay nga tuig namatikdan niini nga duna nay laing lake ang iyang asawa human nga namatikdan niini nga wala na magpahilabot kaniya.
Ang duha mag-atubang og kasong adultery nga isang-at karong adlawa. (BBT)