USA ka 21 anyos nga job order (JO) nga encorder sa Mandaue City Hall gidakop sa mga sakop sa City Mobile Force Company (CMFC) sa Cebu City Police Office (CCPO) sa Barangay Estancia, Mandaue kagahapon, Pebrero 16.
Si PLtcol. Randy Korret, force commander sa CMFC-CCPO, maoy nangulo sa operasyon, dala ang warrant of arrest nga giisyu ni Presiding Judge Lucila M. Cad-Enjambre niadtong Oktubre sa milabay nga tuig sa kaso nga lugos.
Walay piyansa nga gihatag ang korte sa iyang temporaryong kagawasan.
Giila ni Korret ang dinakpan nga si Jagger Ace Atienza, 21, ug kasamtangan nga usa ka job order encorder nga trabahante sa Mandaue City Hall.
Matod ni Korret, si Atienza lumad nga taga Barangay Lamac, lungsod sa Pinamungajan apan kasamtangan nga nanimuyo sa barangay kon diin kini nadakpan.
Dugang ni Korret nga ang warrant of arrest nigawas niadto pang Oktubre sa nakalabay nga tuig. Ang dinakpan kasamtangan nga gipriso karon sa detention cell sa CCPO. (BBT)