BUTANGAN og signal jammer ang Cebu City Jail (CCJ) Male Dormitory aron paglikay sa padayon nga pagpakatap sa gidiling drugas sa siyudad sa Sugbo.
Kini sigon ni Jail Superintendent Julius Arro, warden sa CCJ Male Dormitory.
Matod niya, kini ilang buhaton tungod ilang nasuta nga adunay drug lords nga anaa na sulod sa prisohan ang nagpadayon gihapon sa ilang mga negosyo ug mao usab ang modiktar sa mga transaksyon gamit ang cellular phones nga ilegal nga gipasulod sa maong pasilidad.
Aron dili maapektuhan sa signal jam, kinahanglan pa morehistro ug kinahanglan usab sutaon kon legal ang maong numero.
Magbutang usab sila og usa ka ekipo o makina nga maka-detect og mga kontrabando nga dad-on sa mga mobisita sa mga piniriso human sa pipila na ang nasakpan nga magdala og ilegal na drugas pinaagi sa pagsulod niini sa mga pribado nga mga parte sa lawas.
“Nakapasok ang illegal drugs diri because of mga dalaw nato mao ang carrier. Even, using their private parts of the body to hide the contraband especially the illegal drugs,” saysay niya.
Dugang ni Arro, dili sila makainspeksyon og maayo samot na kon ang mga kontrabando anaa gisulod sa mga pribado nga parte sa lawas tungod basin sila pasakaan usab og kaso.
“Equipment nga maka-detect sa mga kontrabando sa lawas sa mga bisita. Kanang maka-ultrasound lang, kanang dili lang makita ang private parts para dili kami makasohan,” pasabot ni Arro.
Saysay usab niya nga andam ang Cebu City Council nga mohatag og tabang kanila alang sa ing-ani nga mga makina.
Ingon usab niya nga kini dili makiangayon tungod daghan ang nagtuo nga gikan sa sulod sa pasilidad ang mga drugas bisan ang tinuod kini gidala lang gikan sa gawas.
COVID-2019
Tungod sa hulga sa Covid-19, adunay thermal scanner nga gigamit ang Cebu City Jail alang sa mga mobisita sa mga piniriso aron paglikay nga dunay matakboyan. (JCT)