2 sikop sa illegal numbers game

DUHA ka mga coordinator sa ilegal nga Small Town Lottery (STL) ang gipangpusasan, lakip ilang mga usher human sa joint operation sa kapulisan sa probinsiya sa Sugbo.

Si Kevin Joseph Uy Maravillas, 47, taga Brgy. Poblacion lungsod sa Asturias, coordinator, napusasan niadtong Sabado sa alas 3:00 sa hapon didto sa ilang lugar.

Si Maravillas nakuhaan sab sa iyang paltik nga kalibre .45 nga dunay tulo ka mga buhing bala sa magazine niini.

Lakip sa napusasan ang iyang usher nga si Jean Claude Van Aguanta, 28, nagpuyo sa nahisgutang lugar.

Ang joint operation gilangkuban sa mga sakop sa Regional Intelligence Division (RID-7), Integrity Monitoring Enforcement Group (IMEG) Visayas, PIB-CPPO, Asturias Police Station human daghang reklamo batok niini.

Tungod sa maong impormasyon daling mihimog aksyon ang kapulisan human sab mimando si P/Brig. General Albert Ferro, direktor sa Police Regional Offcie (PRO) 7 nga undangon ang illegal gambling sa tibuok rehiyon.

Ang mga operatiba kunuhay mipusta ngadto sa usher nga si Aguanta, dihang gi-remit sab niya ngadto sa coordinator nga si Maravillas, dalidali silang gipangpusasan.

Nakuha sa kapulisan sa ilang posisyon ang mga gambling paraphernalia, ingon man halin sa illegal gambling nga P3,200.

Nasurprisa si Maravillas, kinsa wa makalihok, nakuhaan pa siyag paltik nga armas.

Sa intelligence report, si Maravillas, nailang “Kingpin” sa illegal numbers game sa maong lugar. Ang operasyon niini moabot na sa Balamban, Tuburan, ug ubang mga lugar.

Si Maravillas gireklamo sab sa kanunay niining pagdaladalag armas. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph