Suspek sa druga naunay sa iyang armas

MGA EBIDENSIYA: Mao kini ang mga ebidensiya gikan sa suspek nga naunay sa iyang armas sa operasyon sa kapulisan sa Barangay Duljo Fatima, dakbayan sa Sugbo. (Benjie B. Talisic)
MGA EBIDENSIYA: Mao kini ang mga ebidensiya gikan sa suspek nga naunay sa iyang armas sa operasyon sa kapulisan sa Barangay Duljo Fatima, dakbayan sa Sugbo. (Benjie B. Talisic)

NALANDIG sa ospital ang suspek nga gironda sa mga operatiba sa Drug Enforcement Unit sa San Nicolas Police Station sa hapon niadtong Sabado, Pebrero 15, sa B. Aranas sa Barangay Duljo Fatima, siyudad sa Sugbo.

Si PCapt. Caesar Acompanado, officer-in-charge sa San Nicolas Police Station, kuyog ang iyang mga operatiba sa DEU sa Station-6 mipatuman og buy-bust operation kuyog usab ang Mambaling Police Station sa nahisgutang lugar.

Matod ni PCapt. Acompañado nga ang ilang target si Jayward Orcullio, kinsa notado nga mamaligyaay sa maong lugar, maoy ilang gironda didto sa sudlunon nga dapit sa Barangay Duljo Fatima.

Dugang ni Acompañado nga dihang napalitan na si Orcullio sa poseur-buyer ug nisinyas nga positibong napalitan ang suspek paggawas na unta sa pultahan apan nibalik sa agi aron mosibat.

Apan napalpak ang iyang plano human nga sa pagdali dali sa suspek nahulog ang .38 nga revolver nga armas nga anaa sa hawakan ni Orcullio kinsa naka shorts nga walay bakos ug rason nga nahulog ang armas ug nibuto dihang pagkahulog sa semento hinungdan sa pagkaigo sa tuong tiil niini.

Gidala si Orcullio sa mga operatiba sa Cebu City Medical Center human nga nasamdan ang tuong tiil tungod sa pagka disgrasya niini.

Ang transparent bag nga dala sa suspek kon asa ang mga shabu niini gibutang, didto sa iyang bugan aron kunohay nga dili makit-an apan nabulabog hinuon human nga naunay sa armas.

Giangkon sa suspek nga anaa niini gitago ang shabu atubangan sa bugan dihang gusto niini sutaon kon wala bay samad ang iyang paa human mahulog ang armas.

Gibanabana nga moabot sa kapin sa P200 mil ang balor sa shabu nga anaa sa bag ni Orcullio.

Matod pa, aduna pay usa ka 35 gramos nga bulto ang anaa sa bag nga gituohan nila ni Acompañado nga bag-o pang gihatud sa suspek.

Sa kasamtangan anaa sa tambalanan ang maong dinakpan. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph