ANDAM ang Cebu City Government pinaagi sa Prevention Restoration Order Beautification Enhancement (Probe) nga mohatag og ayuda sa barangay labot sa ilang road clearing.
Si Raquel Bohol-Arce, pangulo sa Probe, nagkanayon nga nanawat na sila og request gikan sa mga barangay captain sa 80 ka barangay sa siyudad alang sa maong programa.
“Nanawat nata og request sa mga barangay nga nangayo og ayuda sa opisina with regards to road clearing kay gihingusgan naman nga ang barangay captains naman maoy gitahasan for the barangay roads,” padayag ni Arce.
Ang pangulo sa Probe niingon nga mohatag sila og mga tawo aron maoy motabang sa road clearing operation apan kinahanglan ang mga barangay personnel maoy mangunay sa paglimpyo.
Dugang ni Arce, nga kinahanglan nga adunay public hearing nga ipahigayon aron pormal nga mapahibawo ang katawhan labot sa memorandum circular sa Department of Interior and Local Government (DILG).
Siya nibutyag nga aduna nay mga barangay nga niduol sa ilang buhatan aron magpatabang aron malimpyo ang ilang mga barangay road.
Kini sama sa mga barangay Pasil, Sambag 1 ug Day-as kansang mga clearing operation ipahigayon sa mosunod nga mga adlaw agi sa pagtuman sa mando sa DILG.
Samtang, ang ubang barangay wala pa makalihok sa pag-clear sa dalan sa mga tindahan ug ang ubang barungbarong daplin sa dan ug dunay daut nga sakyanan nga naa gihapon sa dan diin gipanag-iya pa sa barangay. (PAC)