USA ka optometrist, doktor sa mata, ang mag-atubang og kaso human masuta nga nagpakatap kinig sayop sa balita o fake news sa Covid-19.
Matod ni Police Colonel Marlo Castillo, hepe sa Regional Anti Cyber-Crime Unit (RACU) -7, ang maong doktor nga wala lang una niya nganli samtang wala pa mapasaka ang kaso nag-post sa Facebook account niini nga adunay usa ka langyaw nga adunay Covid-19 ang nalandig sa inilang ospital sa dakbayan sa Mandaue.
Giingon sa fake news nga namatay kini sa maong matang sa sakit apan sa dihang gihimo ang imbestigasyon pinaagi sa pagkuhag pamahayag sa kadagkoan sa ospital, nasuta nga wala kini kamatuoran.
Nagpahigayon dayon ang RACU 7 og online investigation pinaagi sa cyber patrolling ug sa abag sa mga tawo diha sa social media pagtug-an sa nahimutangan sa maong doktor dali nila kining nailhan.
“We conducted online investigation through our cyber patrolling. We also conducted field investigation to verify. So immediately nag-dispatch tayo ng trackers team of investigators to proceed immediately duon sa UCMed and verifying confirm if really that is their stand and it turn-out to be fake news,” saysay ni Castillo.
Nahinabi na usab nila ang maong doktor nga napaubos na sa interview sa mga imbestigador sa RACU -7.
Giangkon niini nga nakadawat siyag impormasyon labot sa langyaw nga na-admit sa maong tambalanan ug namatay apan wala niya kini gisusi kon unsa ka tinuod ang nadawat nga kasayuran.
Tungod kay gusto kini nga makauna sa pag-report sa publiko gi-post dayon niya kini sa iyang Facebook account nga nakahatag og kahadlok sa publiko.
“Last Thursday yun nag cyber patrol itong mga patrollers natin at accordingly para ma uuna na daw siya duon sa posting,” mtod ni Castillo.
Tungod sa mando ni PNP Chief Police General Archie Francisco Gamboa nga dakpon kadtong magpakatap og fake news ug pasakaan kinig kaso nunot sa kalapasan sa Article 154 sa Revised Penal Code sa Anti Cybercrime law.
Ang Hunta Probinsyal sa lalawigan sa Sugbo niaprobar sa ordinansa pagsilot sa mga tawo nga maghimog fake news labot sa coronavirus disease sa social media, text messages ug uban pang matang sa komunikasyon.
“Unlawful acts under Section 16 of this Ordinance shall be meted a fine not exceeding P5,000 or imprisonment not exceeding one year or both at the discretion of the court,” tipik sa ordinansa ni Provincial Board Member Kerrie Shimura, chairman sa Committee on Health.
Ang Police Regional Office (PRO) 7 usab pinaagi sa mando ni Police Brigadier General Albert Ignatius Ferro misaad nga ilang ipatuman ang executive order ni Cebu Governor Gwendolyn Garcia nga dakpon kadtong magpatakag pakatap sa sayop nga kasayuran labot sa Covid-19 nga nakapatay na og liboan ka mga tawo didto sa nasod sa China. (B)