NIDEKLARAR og marching order si Mandaue City Mayor Jonas Cortes sa pagpatuman sa 'off limit' sa Butuanon river, Mahiga creek ug Tipolo river aron paglikay nga matakboyan sa poliovirus.
“While it is most unfortunate that this news came at the time when we are still reeling from the effects of COVID-2019, it is good that we knew of this the earliest in order for us to align our time and resources to address this concern,” matod ni Cortes sa text message sa Superbalita Cebu.
Sa pakighinabi ni Cortes pinaagi sa telepono kagahapon, Pebrero 16, kini nagkanayon nga dili bugtong problema sa Mandaue City, lakip na sa ubang local government units (LGU) nga naagian sa Butuanon river sama sa dakbayan sa Sugbo.
“We will have a coordination meeting with Mayor Labella tomorrow morning to address this issue,” matod ni Cortes.
Karon nagtinguha sila nga makaabot og 90 percent rate sa immunization for polio sa kabataan ubos sa edad nga 5 anyos sa Mandaue.
Si Cortes niingon nga ilang pakusgan ang ilang vaccination campaign ug information dissemination batok sa polio ug ubang preventable disease.
Sa pakighinabi ni Mlbnl. John Eddu Ybañez, executive secretary ni Mayor Cortes, kini nagkanayon nga bisan ang Butuanon river tested positive base sa pahibalo sa Department of Health (DOH), ang Mandaue walay kaso sa pagkakaron bahin sa polio.
Ang DOH-Research Institute for Tropical Medicine (RITM) niluwat sa maong taho niadtong Sabado, Pebrero 15.
Ang Butuanon river maoy bugtong suba sa Mandaue nga gitutokan sa mga environmentalist nga himatyon tungod sa grabeng polyusyon gikan sa mga pabrika. (KFD)