SUPERBALITA CEBU

Huwes, misis patay sa sunog

ANG gugmang tiunay sa usa ka retiradong huwes ug iyang asawa maoy naghatod kanila sa ilang kamatayon human nila suwayi sa pagluwas ang ilang kamaguwangang apo nga dunay autism atol sa sunog sa ilang balay sa Zamora st., Barangay Centro, Mandaue City, alas 2 sa kaadlawon sa Lunes, Pebrero 17, 2020.

Ang magtiayong Gerardo Gestopa, Jr., 68, ug Louella Gestopa, 67, nangamatay human mobalik aron pagluwas sa ilang apo, Jeric Gestopa, 21, sa ikatulong andana sa balay.

Wa pa kompirmaha sa kabomberohan ang kamatayon ni Jeric kay wa pa nila makaplagi ang lawas.

Butyag ni Fire Inspector Kyle Bryan Lauzon, deputy fire marshall sa Mandaue City Fire Station, nga ilang nadawat ang alarma mga alas 2 sa kaadlawon.

Iya ning giisa ngadto sa second alarm alas 2:04 sa kaadlawon ug third alarm sa alas 3:32 ug 4th alarm sa alas 2:41 sa kaadlawon.

Nakontrolar ang kayo mga alas 3:05 sa kaadlawon ug si Lauzon nideklarar ini nga hingpit nga napawong mga alas 4:10 sa kaadlawon.

Si Cesar Gestopa, 58, igsuon ni Gerardo, niingon nga ang sunog nagsugod sa balay sa ilang kabanay nga si Erlinda Ermac-Lumapas.

Sila si Cesar, uban sa iyang igsuon si Gerardo ug Louella diha na sa dan Zamora samtang nagpasirit ang bombero sa kayo.

Dihang nahibaw-an nga ang ilang apo nabiyaan sud sa balay, nidagan siya og balik sa nagdilaab nga balay samtang si Louella nisunod sa iyang bana.

Matod sa pamilya nga gibitad sa yaya si Jeric aron molingkawas sa nagdilaab nga balay uban kaniya, apan giingong nilugnot kini.

Ang yaya nakaambak sa bentana ngadto sa atop sa silingang balay hinungdan sa iyang pagkaangol.

Ang sunog nidaut usab sa unom ka residential structures sa Ermac-Gestopa compound nga niabot og P185,000.

Ang mga lawas sa magtiayon nakaplagan sa dan nga naggintang og 10 metros, matod ni Lauzon.

Si Lauzon niingon nga ni-request na sila og K9 unit sa Bureau of Fire Protection (BFP) aron pagtabang nga makit-an ang lawas ni Jeric.

Niadto sila sa ikatulong andana diin didto si Jeric apan wa kini nila makaplagi.

Wa pa mahibaw-i kon unsa ang hinungdan sa sunog.

Ikaduhang sunog

Nianang pagkahapon, laing sunig miulbo sa Almer’s compound, sa Barangay Tabok, Mandaue City mga ala 1 sa hapon.

Ang sunog giisa ngadto sa task force alpha mga ala 1:44 sa hapon ug nakontrolar ang kayo mga alas 2:24.

Gideklarar ni Lauzon ang hingpit nga pagkapawong sa kayo mga alas 4:06 sa hapon.

Labing minos mga P450,000 ang danyos sa mga kabtangan.

Wa nila mahibaw-i ang sinugdanan sa kayo. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph