SUPERBALITA CEBU

Sugilanon: Sa pagbalik ni Treddy

ALAS kuwatro sa kaadlawon. Sa ilang lawak nagdanguyngoy si Meme samtang naglingkod sa ngilit sa kama. Si Treddy, iyang bana, nagsera sa traveling bag nga gisudlan sa iyang mga biste. Kaganiha ra siyang nakailis og sapot alang sa iyang panaw. Pito ka tuig na silang kasal ug may anak lalake nga singko anyos ang edad, si Butyok.

“Mobiya ka na gyud namo, Tred?” ni Meme nga namahid sa iyang mga luha.

“Kinahanglan nga magbuwag ta, Me. Mabdos si Katya. Gikinahanglan ko niya aron mobarog atubangan sa iyang ginikanan, aron pagsalbar sa iyang dungog,” matod ni Treddy.

“Si Butyok intawon, mawad-an siyag amahan,” ni Meme. “Ako, nakasabot ko nga wa na kay gugma nako, apan si Butyok nagkinahanglan sa imong pagmahal isip iyang amahan.”

“Ayaw kabalaka ana. Suportahan ko siya. Gahinan ko siyag kantidad matag buwan.” Gipunit ni Treddy ang traveling bag. Mitan-aw kang Meme ug nanamilit. “Adto na ko. Nahibawo ko nga gimahal mo ako, apan mas gimahal ko karon si Katya.”

NAGPUYO sila si Treddy ug Katya apan dili kasado. Nagplano si Treddy nga payilan niyag legal separation si Meme. Malipayon si Treddy sa iyang kinabuhi uban kang Katya. Seksi si Katya ug labaw sa tanan, maayo modala si Katya sa duwa sa kama ug matagbaw gyud siya.

Usa ka gabii samtang nagminahalay sila sa ilang kama may gisulti si Treddy kang Katya.

“Mo-file kog legal separation kang Meme, hon, aron wa nay hasol atong pagpuyo,” matod ni Treddy. “Karon god, pwede man ko niyang kasuhan og adultery. Malakip pa ka.”

“Sige, hon. Pero di gihapon ta makasal bisan legally separated na mo, di ba? Mao nay akong pagsabot ana,” ni Katya nga mihapuhap sa bus-ok nga dughan ni Treddy.

“Akong konsultahon si Frank, best friend nakong abogado,” ni Treddy. “Ulitawo pa siya, pero eksperto siya balaod kabahin sa family relation.”

Nanglabay ang mga adlaw, apan wala maasikaso ni Treddy ang pag-payil og legal separation kang Meme. Nanganak si Katya og batang lalaki nga gipabunyagan nilag Trevor segun sa awhag ni Katya.

Unya usa ka gabii dihang nahiuli si Treddy sa apartment nga gipuy-an nilang Katya, iyang nakita ibabaw sa tokador ni Katya ang usa ka sulat. Iyang gibasa. “Tred, honey, sorry kaayo nga tapuson na nato atong relasyon. Nahibalik na si Trevor gikan sa Canada. Magpakasal na mi sumala sa iyang saad. Siya ang tinuod nga amahan sa bata nga ‘atong’ anak nga gipabunyagan nato sa samang ngalan. Sa tinuod, si Trev una nga mitisok sa iyang liso sa akong sabakan usa ka buwan sa wa pa ko makigdulog nimo usa ka gabii didto sa motel Ayaw na lang padayona pagpayil og legal separation sa imong asawa./Katya.”

Kalit misurok ang dugo ni Treddy. Nabati niya nga nanghugot sa tumang kasuko ang iyang apapangig. Daw mobuto ang iyang dughan sa kalagot ug kasuko. Mikagot ang iyang mga ngipon. Unya nahinumdom siya kang Meme. Mobalik siya kang Meme ug mangayog pasaylo.

MITUKTOK si Treddy sa pultahan sa ilang balay ni Meme nianang pagka buntag sa misunod nga adlaw. Gibutang niya ang iyang travelling bag sa kilid sa pultahan. Si Asyang, ang katabang nilang babaye, ang miabli sa pultahan. Nahingangha kini sa iyang pag-abot.

“Sir, dia lagi ka?” matod ni Asyang.

“Si Meme, natulog pa?” sumbalik sukna ni Treddy.

“Hala, Sir! Natulog pa sila!” ni Asyang.

“Kinsang sila?” ni Treddy nga nahibulong.

“Si Ma’m Meme ug si Sir Frank. Dugay na man si Atorni Frank nga mipuyo dinhi uban ni Ma’m Meme ug ni Butyok humang mibiya ka!” ni Asyang nga mitutok kang Treddy.

Nahitalunong si Treddy. Nanlipaghong siya nga daling mipunit sa iyang traveling bag ug mibalik sa iyang agi. (Katapusan)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph