SUPERBALITA DAVAO

Roldan: Renewable Energy Act

Nota Bene

BISAN unsa na lang ang buhaton sa madlang pipol aron makadaginot tungod sa pagmahal sa palaliton karon. Mobaklay padulong sa trabahoan imbis nga mobayad og pasahi.

Magdala'g balon aron dili na makapalit og pagkaon. Sagad nga balon para sa udto kay ang salin nga pagkaon sa pamahaw. Hinay-hinay ang paggamit sa aircon sa balay nga gamiton lang sa hapon kung init ang panahon.

Paypay de mano na lang imbis nga bintilador. Sugnod nga uling o kahoy sa pagluto inay nga gasul o "stove" nga de kuryente. Sa merienda, kung di malikayan, kay tubig ug saging na lang inay nga "juice" o "softdrinks.

Ang uban gimemorays ang merienda ug paniudto ilabi na kadtong nagtrabaho sa opisina og dili kaayo nagpasingot. Ang mga trabahante sa konstruksyon kay nagbalon og daghang kan-on ug usa ka lata nga tinapa nga may suka ug sili.

Kinahanglan nila og enerhiya aron makalahutay sa bug-at nga trabaho sa matag adlaw. Dunay gamay nga karendirya diha sa Jacinto Extension ug Mapa St. nga ginakaonan namo kanhi ni Tatay Rene Lumawag nga P25 lang ug kumpleto na ang among paniudto.

Daghan sab nga mokaong mga disenteng empleyado sa buhatan sa palibot. Nagbalon sab og pagkaon ang mga estudyante sa eskwela imbis nga mopalit sa "canteen."

Gamiton nila ang gamay'ng "allowance" nga gikan sa ilang mga ginikanan sa proyekto sa eskwelahan o di ba kaha aron maka-bonding sa ilang klasmayt.

Uyawat na lang nga dili sila maiwit sa ilang mga higala ug malipayon ang ilang kasinatian sa eskwela samtang batan-on pa. Kita sab nga mga ginikanan, unahon kanunay ang panginahanglan sa mga anak.

Imbis nga mopalit og kaugalingon sinina, ang kinakusgang anak maoy palitan. Apan ang dili malikayan sa tawo mao ang pagbayad sa mga "public utilities" sama sa tubig ug kuryente.

Sa pagkatinuod, ang pribadong kompanya ang naggunit sa negosyo sa kuryente og hapit na sa tubig. Kung di ko masayop, usa ang Pilipinas sa may pinakamahal nga singil sa kuryente ug tubig mainom sa Asia.

Hasta ang presyo sa lana hastang mahala mao nga kanunay "short" ang mga tsuper sa jeepney ug taxi sa hataas nga "boundary." Aron makunhuran ang pagsalig nato sa kuryente gikan sa higanteng kompanya, giduso sa kongreso niadtong 2008 ang RA 9513 o gitawag nga "Renewable Energy Act."

Ambot unsay tukmang hubad sa bisaya sa "renewable energy" nga puwede natong tawagon og "enerhiyang pabalik-balik" o "enerhiyang mapabag-ohon" basta kadtong wala nagamit og linya sa kuryente.

Mao kini ang "hydro-electric", "solar" gamit ang adlaw, "windmill" o sabad nga gipatuyok sa hangin, "wave energy" nga gikan sa balod, "geothermal" nga gikan sa bulkan, "biomass" nga gikan produkto sa umahan, ug uban pa.

Buot sa maong balaod nga motaas ang paggamit sa Pinoy sa mga mabag-ohong enerhiya ug makatabang sa dakong problema sa kinaiyahan gamit ang lana ug o "fossil fuel."

Gipasirad-an na sa daghang nasud sa Europe ang paggamit og plantang nukliyar og ang "coal-fired power plant" kay makadaut kini sa kinaiyahan. Unta hingusgan nga ipatuman kini sa gobyerno.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph