DILI ni unang nahitabo. Gani hitak kaayo ni nga panghitabo sa bisan asang selda sa kapolisan sa nasod.
Atong gipasabot dinhi mao kining mga piniriso nga maghikog sulod sa bilanggoan.
Niadtong Biyernes, Pebrero 14, gi-report ni Alwen Saliring sa SunStar Cagayan de Oro ang paghikog ni Florencio Curay gamit ang pisi sa may pansayan sulod sa prisohan sa Maigo sa Lanao del Norte.
Gidakop kini si Curay tungod sa iyang pagsunog sa bata niadtong Pebrero 9.
Matud sa kapolisan nga tingali sobrang depression hinungdan nga wala makaagwanta si Curay naghunos sa iyang kinabuhi.
Ingon lang ba niini ang tubag sa kapolisan kon dunay mamatay diha sa ilang responsibilidad?
Bisan usa ka priso ang tawo bililhon gihapon ang ilang kinabuhi. Busa paningkamotan sa kapolisan nga mapreserba gyud unta ang kinabuhi sa mga binilanggo.
Nganong dili man gyud mahimo sa kapolisan paglimpiyo sa ilang prisohan gikan sa mga butang nga mahimong magamit sa pagpasakit o paghikog sa piniriso?
Ambot kon gitutokan ba kining matang sa problema sa Bureau of Jail Management and Penology. Dugay na kaayo ang maong isyu apan hangtod karon makadungog gihapon ta og piniriso nga naghunos sa iyang kinabuhi sulod sa selda.
Bisan unta sa yano nga paagi pagbutang og mga CCTV aron mamonitor ang mga binilanggo, nahimo kana sa atong kapolisan ug BJMP kon tinguha gyud nila nga maproteksiyonan ang mga piniriso.
Kon duna may nagtiner og CCTV, kana, gamay ra gyud tingali sa tibuok nasod.
Bakikaw man gud paminawon nga samtang naa ka sulod sa prisohan dili pa gyud diay
luwas imong kinabuhi - mahimo ikaw mismo mo pahunong sa imong ginanhawa o dunay laing tawo nga mopatay nimo.
Kining kaso sa paghikog sa mga piniriso sulod sa selda tataw nga usa ka pagpabaya sa atong kapolisan o BJMP personnel nga maoy nagpalig-on unta sa pagmintinar sa kalinaw ug kaluwasan sa mga tawo sulod sa bilanggoan.
Mas maayo tingali konsiderahon sa atong mga magbabalaod pagpanday og balaod nga magsilot niadtong tawo sa awtoridad nga nagpabaya sa iyang katungdanan sama niining mga guwardiya nga magtanga.
Mahunong na unta kining mga report nga dunay priso nga naghikog sulod sa selda o pansayan sa bilanggoan. Ngil-ad kaayo paminawon nga nahitabo kini ubos sa pag-atiman ug responsibilidad sa atong gobiyerno.