WALAY Pilipino nga nagpakatap og Covid 19 dinhi sulod sa Pilipinas. Maayo kini nga balita. Gani, makadasig ang balita sa atong higalang Ted Ayeng nga ang mga PUI kun patients under investigation didto sa Lalawigan sa Bohol wa gyud diay matapti.
Bisan pa man, di kita angayang mokompyansa sa atong monitoring labi na diha sa mga paluparan ug pantalan.
Malipay ko makaagi niining mga modernong ekipo nga pag-ila sa gihilantan inig sulod og hotel. Mas mayo gyud nga magsigi kitag bantay kay bisan usa lang ang mataptan ug makasugod sa pagtakod, dali ra kaayo mokuyanap kining Novel Coronavirus o Covid 19.
Sa laing bahin, atong nabasa sa mga balita ni Ted Ayeng nga nikunhod sa pagmaayo ang mga presyo sa mga tourist facilities sa Bohol.
Gani, dunay mga establisemento nga nipakunhod ngadto sa 50-60 porsiyento.
Karong wala diay Covid-19 sa Bohol ug, sa akong tan-aw, ka-istrikto sa monitoring karon, maayo diay nga mobakasyon.
Hinuon, kana kon dunay gamayng pundo. Mao karon ang maayong panahon nga maglulinghayaw sa mga maanindot nga lugar sama sa Panglao nga di kaayo tanto mabuslot ang bulsa
Sa laing bahin, magbantay sab kita nga duna bayay mga industriya nga maigo sab og krisis.
Pananglitan, mogamay gyud ang kita sa mga tourism-oriented facilities. Kay gamay na lang ang abli sa mga pabrika sa China, daghan karon ang dunay kulang sa supplies.
Gani, nakahisgot man ko sa kakulang karon sa mga kargamento nga gikan sa China. Kay si kinsa man sab ang gusto og produkto nga gikan sa China?
Bisan gani og buwak nga madungog nga gikan sa China sa miaging Valentine’s Day, daghan ang dili mopalit. Ambot lang kay mailad man daw sab kon ingnong gikan sa India.
Di baya makatakod ang mga buwak. Hinuon, gamay ra sab ang buwak gikan sa China tungod sa travel ban.
Tungod niining travel ban, dunay posibilidad nga mokunhod ang presyo sa gasoline ug krudo kay nimenos ang pagbiyahe sa mga abyon ug mga barko. Apan mao lagi na, samtang mobarato ang lana, mawala man sab ang mga palaliton.
Sa akong panahom, mas maayong tun-an kining ekonomikanhong kahimtang karong tuiga. Daw nayabag karon ang projections sa kagamhanan ug sa pribadong sector dili lang dinhi sa Pilipinas. Apil ang ang tibuok kalibotan.
Ang abtik makahupot dayon sa kahimtang karon ug makamugna dayon og saktong plano maoy makabenepisyo sa pagmaayo.
Ang ako lang nabalak-an kay hangtod karon, wa pa man mahuman ang mga binate ug way buot nga away sa politika. Woi! Dugay pa ang eleksyon. @anol_cebu sa Twitter