PATAY ang drayber human nahulog ang bus sa pangpang nga bahin nga dunay gilawmon nga 20 ka tiil, Dominggo, Pebrero 16, mga ala 1:05 sa hapon sa Sayre Highway Purok 7, Upper Puerto ning siyudad sa Cagayan de Oro.
Ang drayber naila nga mao si Rito Reyes, 47, taga Bagong Taas, Valencia City samtang ubay-ubay ka mga pasahero usab ang samaran nga nadala sa nagkadaiyang balay tambalanan ning siyudad ug luwas na sa delekadong kahimtang.
Ang maong bus sa Super5 nagdala sa numero nga body number nga S-220 ug numero sa plaka nga AGA-9268 nga gikan sa Maramag, Bukidnon paingon sa dakbayan.
Sa impormasiyon gikan sa kapulisan sa Police Station 6 (PS6) sa Puerto, gikabutyag nga nakabsan sa kinabuhi ang drayber gumikan sa grabeng samad nga naangkon.
Gikabutyag nga ila pa nga imbestigahan ang maongpanghitabo labi na nga giingong posibleng tungod kini sa kadanlog sa dalan gumikan kay nakasinati og ginagmay nga pag-ulan ug nakadawat usab sila og taho kalabot na nga duna kini na-engkwentro rason nga kalit nga nitunob sa brake ug naligyas ang ligid.
Gidugang pa nga posibleng nalagpot ang biktima ug nalatayan sa maong bus una nilahos sa ubos.
Nagpasalig usab ang tinugyanan sa Super 5 nga abagahon ang mga balayrunon sa mga biktima samtang ang bus ang gitakda pa nga kuhaon gikan sa nahulogan.