USA ka lalaki ang nakabsan sa kinabuhi human gipusil sa bayaw niini niadtong Dominggo, Pebrero 16, mga alas 3:50 sa hapon sa Purok Tala sa Umaga, Salawagan, lungsod sa Quezon, Bukidnon.
Ang biktima giilang si Rey L. Sellar, 29, residente sa susamang dapit.
Gitumbok nga suspetsado si Jay Barry P. Andoy, mag-uuma, residente sa susamang dapit.
Sa inisyal nga imbestigasyon sa Quezon Police Station ubos ni Police Major Motchel C. Clemencio, nasayran nga nahinaykan sa suspek kining biktima human una pa daan anaa na kini sa panimalay sa suspek.
Giingong nagdala-dala kini og kutsilyo ug nagsige pamulong og mga dautan nga sulti batok sa suspek.
Gitouhang sa kaulit sa suspek hinungdan misulod kini sa puloy-anan ug mikuha sa iyang kalibre nga armas ug gipusil makapila ka higayon ang bayaw.
Usa ka silingan sab nga mao si Elmer Baluran, ang naigo sab sa iyang tiyan dihang misulay og badlong sa duha.
Daling gipangdala sa St. Ann Medical Hospital sa Quezon, Bukidnon ang mga biktima apan si Rey gideklarang dead on arrival ni Dr. Joe Vet Tadlas.
Ang silingan giduso sa Bukidnon Provincial Hospital sa Malaybalay City.
Ang suspetsado sakay sa motorsiklo ang daling misibat human sa insidente ug gipangita na karon sa kapulisan.
Nahipos sab sa crime scene ang lima ka basyo sa bala sa kalibre .45.