NUNOT niining pag-takboy karon sa African Swine Fever (ASF) sa mga baboy ug ang pag-ban o pagdili nga makasulod na ang mga buhing baboy og mga karne niini dinhi sa lalawigan sa Sugbo, dako ang posibilidad nga adunay shortage o pagnihit sa supply sa karning baboy dinhi. Gi-ban na ang mga baboy gikan sa tibouk isla sa Mindanao nga makasulod dinhi sa Sugbo base sa executive order nga gipagawas ni Gov. Gwen Garcia. Ang Mindanao labi pa ang General Santos City maoy nag-supply og daghang baboy dinhi sa Sugbo.
Nunot niini, nahuna-hunaan karon sa taga Department of Agriculture (DA 7) nga ipaihaw na lang ang mga rabbit inay karneng baboy. Matod pa ang karne sa rabbit puno sa nutrients og bitamina unya dili maka-high blood, dili sama sa baboy. Ang karne sa rabbit gikonsiderar kini nga “white meat” sama sa karne sa manok ug makaayo gyud kini sa panglawas. Ambot aduna na man kunoy nag-ihaw ug nagbaligya ana dinhi sa ato. Lami kuno labi pa og barbekyuhon.
Sus, tan-awon nato nang rabbit morag wala man gyuy kalainan sa ilaga. Dunggan ra may deperensiya. Bisan pa sa among kapobrehon niadtong didto pa ko sa probinsiya sa Mindanao, sa akong yutang natawhan, wala man sab mi makaka-on o mokaon anang ilaga. Dili sama sa ubang mga tribo o ubang nasud nga nahimong delicacy na ang ilaga. Morag manglimbawot pa ang akong mabahibo nga mokaon anang maong matang sa karne.
Ang grupong People for the Ethical Treatment of Animals (Peta) misugyot nga dili na kita mokaon og karne kay nagdala og sakit ang ubang mga hayupan sama aning Covid-19. Inay utan ang ilang ipakaon o mag-vegetarian na ta. Matod pa sa taga Peta nga hugaw lagi kuno ang karne gikan sa mga farms, sa ihawan ug sa pagluto. Kay ngano man diay ang utanon wala ug dili matakbuyan og kagaw?
Wala may problema anang utan kay mokaon man sab ta. Apan mausab ba nimo ang gusto sa tawo nga mokaon gyud og karne. (bobbygnalzaro@gmail.com)