GI-ANGKON sa Regulatory Compliance Board (RCB) nga maglisod sila labi na diha sa regulasiyon sa mga giingong posibleng kabit nga mosulod sa mga hotel sa dakbayan sa Cagayan de Oro.
Kini human sa insidente nga dunay usa ka bana nga nasapon sa iyang asawa kauban ang dalaga sulod sa motel nga nahimutang sa Barangay Kauswagan ning siyudad atol sa Valentine's day.
Sa pakighinabi sa Superbalita Cagayan de Oro kang Antonio Resma Jr., Inspectorate Team leader sa RCB, gibutyag niini nga lisod kini nga ma-regulate apan nibutyag nga ilang posibleng tun-an kung unsay mahimo labi na nga ang siyudad hugot ang kampanya dili lang sa child friendly city apan lakip na sa paghatag og dako nga importansiya diha sa pagpalig-on sa pamilya.
"Atong i-review pero most probably kanang mga ingon ana naa man go'y other set of balaod sama sa adultery kay ginabawal man gyud na pero kung moingon ka mga i-regulate ang mga establishments para ana medyo apeke sa amo nga part sa RCB pwedi nato istudyohan kung unsay mga legal implication," matud ni Resma.
Gidugang pa niini nga dili usab maayo nga grabe na ka-istrikto ang dakbayan nga posibleng maglisod na ang mga bisita sa siyudad sa pagpangita og makatulgan labina nga gi-promote sa dakbayan ang tourism destination.
Bisan kun dili na kini iya sa RCB, apan nakaabot kini sa ilang atensiyon, rason nga buot sila manawagan sa negosyante nga magbutang og rekord nga posibleng makatabang sa mga asawa o bana nga mohimo og legal nga aksiyon ug mamahimong usa sa mga ebedensiya labi na kung masapon kini nga nagbudhi.
"Dili lugar i-report sa pulis but at least naay record posible na nga makatabang suporta lugar kung naa man galeng asawa o bana nga magreklamo," dugang pa.
Nagpahimangno usab kini dili lang sa mga menor de edad apan sa tanan nga ang Valentine's Day unahon ang pamilya.