Migallen: Ang bag-ong format sa NBA All-Star game

SUKWAHI sa mga nangagi, daghan ang nalingaw ug natagbaw sa 2020 All-Star Game sa National Basketball Association (NBA) nga gipahigayon kagahapon didto sa Chicago, USA.

Maayong pagkahan-ay ug pagkahaom sa format nga gisubay sa maong duwa kay mapugos man gyud ang matag habig sa pagwadwad aron modaog ang ilang team nga maoy nakapaalegri ug nahakatag og kakulba ngadto sa mga fans.

Kon kaniadto bati-on ka og kala-ay ilabi na sa naghinapos nga bahin tungod kay dili man motinuod og duwa ang mga players, kagahapon dako kaayo og kalahi-an kay makita na man ilang hugot nga depensa.

Gitapos ang duwa sa mainiton nga panagsangka diin ang Team LeBron nakakita og gamayng lungag sa kadaugan human kini maoy unang nakaabot og 157 points pinaagi sa free throw ni Anthony Davis, 157-155.

Sa sinugdanan, makalibog ang bag-ong format pero napamatud-an nga alegre diay nga nasunod.

Ang modaog sa matag kuwarter, makadawat og P100,000 nga charity bonus. Ang Team LeBron nga ubos sa pagdumala ni Los Angeles coach Frank Vogel, midaog sa first quarter, apan gibawsan kini sa Team Giannis ni Toronto Raptors coach Nick Nurse sa second quarter. Natabla sila sa third quarter.

Human sa tulo ka mga quarters, gisumada ang tanan nilang score. Ang Team Giannis mitali og 133 samtang 124 ang sa Team LeBron.

Imbis moduwa sulod sa laing 12 minutos alang sa fourth quarter, gilahi na kay ang ubos sa format maka-una og 157 points maoy modaog.

Sa ato pa dugangan lang og 24 puntos ang 133 sa Team Giannis ug mao na kini ang ilang target score o daugan. Ang 24 puntos nagsilbing pahinungod ni Kobe Bryant kinsa uban sa iyang anak nga si Gigi ug laing pito ang namatay sa na-crash nga helicopter niadtong Enero 26, 2020.

Ang tanang player ning duwaa pulos gyud gusto nga modaog.

Tuod man nasikit ang panagsangka sa fourth quarter ug ang free throw ni Anthony Davis human kini gi-foul ni Kyle Lowry maoy nakapa-157 sa Team LeBron nga sa samang higayon maoy mituldok sa ilang kadaugan atubangan sa 17,808 ka mga fans sulod sa United Center.

Posibling sa sunod tuig, mao gihapon ning format ang sundon kay mihaom man sa katuyoan.

Mao nay nakanindot sa NBA kay dili gyud sila moundang sa pagpangita og makaayo sa lega.

Kanang makapaalegre sa mga duwa.

Unya open-minded sab sila, kana bang modawat og mga sugyot o suggestions.

Mora og duna gyuy mosunod ani nga format sa All-Star Game da. Atong tan-awon.

•••

By the way, karon diayng adlawa ang ika-40 dias sa akong amahan nga si Papa Emilio Sr. kinsa mipanaw na sa laing kalibutan niadtong Enero 10, 2020.

Pahibawo ngadto sa akong mga ig-agaw, kaperyentihan ug kahigalaan nga ang misa ipahigayon sa sam-ang Katoliko sa Trinity Forest Park sa Sta. Cruz, Balamban sa alas 10 sa buntag. Daghang Salamat. (jun.migallen22@gmail.com)