GIPABULHOT sa NLEX Road Warriors ang ilang opensa sa hinapos nga bahin aron lupigon ang kuwangan og mga haligi nga San Miguel Beermen, 103-97, kagahapon sa Phoenix Super Basketball Tournament sa Upper Deck Gym sa Pasig City.
Gipangulohan ni JR Quinahan ang Road Warriors pinaagi sa iyang 14 puntos, ningdugang og 11 puntos matag usa sila si Kiefer Ravena ug Bong Galanza.
Si Mo Tautuaa mitali og 15 puntos alang sa Beermen kinsa ningkombati nga wala ang duha sa ilang mga haligi nga sila si Junemar Fajardo ug Marcio Lassiter, kinsa sunodsunod nga nangaangol.
Si Fajardo nabalian og bukog sa iyang tuo nga tiil atol sa ensayo sa Beermen. (ESL)