NAHAN-AY na sa student-athletes sa Rehiyon 7 ang ilang training alang sa Central Visayas Regional Athletic Association (Cviraa) Meet.
Kini human nipagawas ang organizers og bag-ong eskedyul alang sa pagpahigayon sa nauswag nga kompetisyon. Gikatakda na kini karong Marso 15-21 sa Dumaguete City gihapon.
Ang 17-Under sporting event nga gipasiugdahan sa Department of Education (DepEd-Region 7) orihinal nga gikatakda niadtong Pebrero 22-29 apan nauswag kini gumikan sa hulga sa coronavirus disease 2019 (Covid-19).
Linibong mga student-athletes sa elementarya ug high school lakip na ang mga ginikanan ug coaches ang magtapok sa City of Gentle People alang sa kompetisyon.
Kini maoy ikaduhang sunodsunod nga katuigan nga mo-host ang Dumaguete sa matag tuig nga kalihukan.
Magsangka sa kompetisyon mao ang Cebu City, Lapu-Lapu City, Dumageute City, Cebu Province, Tagbilaran City, Mandaue City, Danao City, Bayawan City, City of Naga, Talisay City, Bogo City, Toledo City, Bais City, Siquijor, Guihulngan City, Carcar City ug Tanjay.
Ang events nga kombatihan mao ang archery, athletics, arnis, badminton, billiards, baseball, basketball, 3 on 3 basketball, boxing, chess, football, futsal, sepak takraw, softball, swimming, tennis, table tennis, taekwondo, volleyball, wrestling, wushu, pencak silat, gymnastics, aero gymnastics ug dancesport.
Ang medalists sa kompetisyon mao ang molangkob sa Cviraa team nga mokombati sa 2020 Palarong Pambansa sa Marikina City karong Mayo.
Gawas sa CVIRAA, ang Dumaguete mo-host sab sa Philippine Collegiate Champions League (PCCL) Regional ug PCCL Finals sa Marso. (RSC, ESL)