DUGANG 16 ka mga Pinoy ang napalgang positibo sa novel coronavirus (COVID-19) sa Japan sa weekend, nga nidala sa kinatibuk-ang Pinoy nga natakbuyan luwan sa MV Diamond Princess cruise ship ngadto sa 27 sa Lunes, Pebrero 17.
Si Department of Foreign Affairs (DFA) Assistant Secretary Eduardo Meñez nisulti sa usa ka press briefing sa Malacañang nga ang tanang 27 mga tripolante sa cruise ship nga gi-quarantine sa Yokohama, Japan.
“Everyone has been brought to the hospital for better care,” matod ni Meñez.
Siya niingon nga ang Philippine Embassy sa Tokyo nakigtambayayong na sa hingtungdang mga ahensya sa kagamhanan sa Pilipinas ug Japan ingon man sa World Health Organization (WHO), sa Princess Cruises ug manning agency aron mahatag ang mga panginahanglan sa mga PInoy ug mapahigayon ang ilang pagpauli sa Pilipinas.
Si Meñez niingon nga ang sitwasyon sa mga Pinoy nga sakay sa barko gituki sa usa ka tigom sa technical working group sa Inter-Agency Task Force for the Management of Emerging Infectious Disease (IATF).
Ang TWG mopresentar sa iyang rekomendasyon ngadto sa task force atol sa tigom karong adlawa, Martes, Pebrero 18.
“Of course, nothing will move without the clearances of the Japanese government and I understand that some countries have already repatriated (their citizens),” matod ni Meñez.
“But, as you know, most of the people that we have are crew members (of the ship) so we will await the recommendations of the technical working group with regard to the labor and immigration requirements before they can be sent home,” siya nidugang.
Niadtong Dominggo, Pebrero 16, 2020, ang kagamhanan sa Japan niingon nga kinatibuk-ang 355 ka mga tawo nga sakay sa barko ang napalgang positibo sa virus.
Ang barko dunay 3,700 ka mga pasahero ug tripolante, ang 1,219 gi-test. Ang 14-ka adlaw nga quarantine period matapos sa Pebrero 19, 2020.
Si Meñez niingon nga ang mga Pinoy nga luwan sa barko di ma-repatriate sa di pa ang Pebrero 19. Kon tugtan ba sila makapauli sa ilang pinuy-anan di pa mahibaw-an, siya nidugang.
Gawas sa 27 ka mga Pinoy sa Japan, usa ka Pinoy sa United Arab Emirates (UAE) nagpakita og mga simtomas nga Covid-19, ang sakit nga respiratory nga dala sa novel coronavirus.
Way mga Pinoy sa China nga napalgang positibo sa virus.
Sa Pebrero 16, 2020, ang WHO niingon nga dunay 51, 857 ka mga kasong kompirmado sa mga kaso sa Covid-19, ang mosunod: 51,174 sa China ug 683 sa ubang mga nasod.
Ang namatay sa mao nga sakit niadtong Dominggo moabot na og 1,666 sa China ug tulo gawas sa China. (MVI, SunStar Philippines)