NANAWAGAN si Land Transportation Office (LTO) Central Visayas Director Victor Caindec ngadto sa mga tagiya og sakyanan nga kuhaon na ang ilang plate numbers.
Gibutyag ni Caindec nga sa 31,000 ka mga plaka nga mamahimo nang makuha, 713 pa lang ang ilang na-release base sa ilang datus niadtong Dominggo, Pebrero 16.
“Please help us solve the problem. Kindly get your plates now. SM Seaside management has given us a very comfortable and accessible location for you to get yor plates numbers,” asoy ni Caindec sa Facebook post kagahapon, Pebrero 17.
Mamahimong makuha ang mga plaka sa Lower Ground Floor, City Wing, sa SM Seaside City Cebu sugod alas 10 sa buntag hangtod sa alas 7:00 gabii gikan Pebrero 13 hangtod Pebrero 19.
Pagdala lang og kopya sa Certificate of Registration ug Official Receipt sa sakyanan, usa ka valid government-issued ID, ug Notarized Special Power of Attorney alang ngadto sa mga mukuha og plaka pinaagi sa ilang representante.
Ang mga plaka nga mamahimo nang makuha alang ngadto sa mga nagparehistro niadtong tuig 2015 ug 2016.
Gipahibalo sa LTO nga walay labot sa pag-release ang mga plaka alang sa motorsiklo sanglit gitrabaho pa kini sa LTO Central Office-Plate Making Plant. (NDT)