SUPERBALITA CEBU

Daluz bag-o nang chairman sa MCWD board

NAPILI nga chairman sa Board of Directors (BOD) sa Metro Cebu Water District (MCWD) si Atty. Jose Daluz III atol sa eleksyon nga gipahigayon dungan sa ilang pormal nga pag-asumir sa katungdanan kagahapon, Pebrero 17.

Si Atty. Francisco “Frank” Malilong maoy napili nga vice-chairman ug Secretary si Miguelito “Mike” Pato, kinsang appointment gi-confirm na sa Local Water Utilities Administration (LWUA) pinangulohan ni Acting Administrator Jeci Lapus, kinsa nitambong sa turnover ceremony.

Si Lapus nipasabot nga mahimo nang makabuhat sa ilang trabaho ang tulo ka sakop sa BOD sanglit majority na sila samtang padayon pa sila pagsusi sa appointment nilang kanhi mayor Alvin Garcia ug Atty. Manolette Dinsay.

“Yung board tatlo muna and we will be working on the other two. Alam ninyo 5 months in the making ang pag-upo ninyo diyan, maraming batikos ang inabot natin,” padayag ni Lapus, kinsa apil sa gipasakaan og kaso ni kanhi mayor Tomas Osmeña sa Ombdusman.

Matod ni Lapus nga ilang madepensahan ang ilang kaugalingon uban ni Mayor Edgardo Labella labot sa criminal ug administrative cases gumikan sa kapakyas paghatag og igo nga suplay sa tubig sa kanhi lima ka sakop sa BOD nga gitangtang ni Labella niadtong Oktubre 15.

Si Daluz, Malilong ug Pato maoy nihulip sa interim board nga giumol sa LWUA pinangulohan ni Atty. Roberto San Andres, kinsa nilingkod sa MCWD Board sa miaging lima ka buwan ug wala nidawat sa ilang honorarium sanglit ang ilang gusto mao ang pagserbisyo.

Matod sa bag-ong chairman sa MCWD nga dako ang ilang giatubang nga hagit karon ug ilang himuon kutob sa ilang mahimo nga mahatag ang maayong serbisyo.

“Wish us all luck and pray for us and we promise that we will do our best to make Cebu City better in water service,” padayag ni Daluz.

Lakip sa ilang nahunahunaan nga solusyon sa problema sa tubig mao ang pagtukod og dagko nga dam sa Mananga para sa long term ug desalination plant sa medium term ug ang pagkuha og dugang tubig sa water source para sa short term.

Ang supply sa MCWD anaa lang sa 50 porsiyento sa ilang franchise area apan ilang tinguhaon nga makab-ot ang 80 porsiyento sa supply sa tubig para sa mga kabus ug middle class kinsa maoy labing nanginahanglan sanglit ang mga adunahan adunay kaugalingong suplay sa tubig. (PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph