INAY buwak ang ihatag sa Valentines Day, 31 ka counts sa kasong cyber libel ug grave threats ang gisang-at ni Cebu City Administrator Floro Casas Jr., batok ni kanhi konsehal Pastor “Jun” Alcover Jr., niadtong Pebrero 14, 2020.
Si Casas niduso sa maong mga kaso sa Cebu City Prosecutor’s Office isip tubag sa mga alegasyon ni Alcover sa iyang programa sa radyo ug post sa social media niadtong Pebrero 10 hangtod Pebrero 13 nga giingong libelous subay sa Republic Act 10175.
Tulo ka mga empleyado sa Cebu City Hall nga gilangkuban nilang Jonil Matuguina, Irvin Cabables ug Jundel Bontuyan ang niluwat og affidavit ug nakabasa sa giingong mga libelous post ni Alcover.
Si Alcover nihimo og mga komentaryo sa iyang programa sa radyo nga gi-live sa iyang social media account ug mga post sa Facebook.
Iyang gipasanginlan ang city administrator nga wala ni-release sa pundo para mahatagan og sweatshirt para sa 2,500 ka mga habalhabal driver nga iyang gitawag og ‘motorcycle taxi’ (Motax) nga giingong maoy gisaad ni Mayor Edgardo Labella.
Pipila sa mga post ni Alcover sa social media nga gibutang sa mg annexes didto sa reklamo ni Casas. Nipasangil si Alcover nga gisabotahe ni Casas ang paghatag og libreng uniforms sa mga habalhabal drayber.
Iya usab nga gitawag og ‘Cashas’ si Casas ug gipasanginlan nitago sa kwarta kay gamiton alang sa election.
Si Alcover wala una nihatag og komentaryo bahin sa mga kaso nga gisang-at sa City Administrator ug naghuwat pa siya nga makakuha og kopya.
Nganong nasuko?
Si Casas nagkanayon nga wa gihisgutan ni Alcover ang tinuod nga isyu nga maoy iyang gikasuk-an.
Ang City Administrator nipasangil nga nirekomendar og siyam ka ngalan si Alcover para mahimong casual employee, apan gibalibaran ni Casas sanglit wala pa makakuha sa ilang quota nga 15 ka casual employee silang KonsehaL Dondon Hontiveros ug Antonio Cuenco.
Dugang ni Casas nga si Alcover nakapasulod na og 36 ka casual employee kun 240% ug lain pa ang di mominos 300 ka mga job order. (PAC)