Marijuana nga naibot miabot nag P272 million

PLANTASYON: Mobalor og P4 milyunes sa tanom nga marijuana ang naibot sa kapulisan, Philippine Drug Enforcement Agency (PDEA) 7 ug Naval Forces Central (Navforcen) sa Barangay Sunog, Balamban niadtong Pebrero 12, 2020. (gikan sa FB page sa PDEA 7)
PLANTASYON: Mobalor og P4 milyunes sa tanom nga marijuana ang naibot sa kapulisan, Philippine Drug Enforcement Agency (PDEA) 7 ug Naval Forces Central (Navforcen) sa Barangay Sunog, Balamban niadtong Pebrero 12, 2020. (gikan sa FB page sa PDEA 7)

KAPULISAN sa probinsya sa Sugbo nakasakmit nag kapin sa P272 million nga balor sa punoan sa marijuana sulod lang sa 14 ka buwan nga anti drug operations sa mga bukirang barangay sa lungsod sa Balamban ug Siyudad sa Toledo.

Ang mga bukirang dapit sa Balamban ug Toledo paboritong tamnan kay bugnaw ug maayo sa marijuana.

Gihulagway sa hepe sa Cebu Provincial Police Office nga nagmalampuson sila sa ilang kampanya batok sa marijuana human maibot ang kapin sa 600,000 ka mga punoan sa ilang anti drug operations sulod sa 14 ka buwan.

Sa data nga gipahibawo ni Cebu Police Provincial Office (CCPO) Colonel Roderick Mariano, nakasakmit silag kapin sa P234 million nga balor sa punoan sa marijuana gikan sa Enero 2019 hangtod Disyembre.

Niadto lang Enero 2020 hangtod Pebrero, nakakuha silag dul-an sa P38 million nga balor sa marijuana, ang labing bag-o mao ang P4 million nga nakuha sa sitio Cogon, Barangay Sunog, lungsod sa Balamban.

Kini naibot sa kapulisan sa probinsya sa Sugbo ug Naval Forces Central (Navforcen) atol sa operation niini sa sitio Cogon.

Niadto pang Pebrero 12 gihimo ang operation sa dihang nakadawat silag impormasyon gikan sa usa ka kasaligang tinubdan.

Dali nga gisusi sa mga sakop sa Provincial Mobile Force Company ang dapit ug dinhi ilang nasuta nga tag-as na nga pananom nga marijuana.

Gihimo gilayon ang pagpang ibot uban sa mga sakop sa Philippine Drug Enforcement Agency, Provincial Mobile Force Company nga gipangulohan ni Police Lieutenant Colonel Rene Kyamko ug Police Major Christian Torres, hepe sa Balamban police.

Nailhan usab nila ang nag tanom nga mao si Narciso Sorilla nga usa ka mag-uuma nga nagpuyo ra usab sa sitio, apan wa na kini maabti sa kapulisan sa iyang balay.

Balamban ug Toledo

Gipasabot ni Mariano nga ang maong mga marijuana plantation ilang nakaplagan sa sitio Quo, Barangay Gaas ug Barangay Sunog nga pulos bukirang dapit sa lungsod sa Balamban ug sa dakbayan sa Toledo.

Sa maong kalampusan sa kapulisan sa probinsya, gipasalamatan ni Mariano ang publiko, lakip na ang mga barangay official nga maoy naghatag sa kasayuran labot sa plantation.

Giangkon ni Mariano nga ang mga dapit diin gipang tanom ang mga punoan sa marijuana naa mahimutang sa labing lisud nga lugar sama sa bakilid nga way makabantay nga mga residente.

Ang Provincial Mobile Force Company inabagan sa Balamban police station ug Navforcen maoy nagtambayayong sa pagpuhag sa marijuana plantation sa tibuok lalawigan sa Sugbo.

“Karamihan dito sa Balamban area at sa Toledo na boundary ng Balamban. Ang area kasi nito ito yung medyo mataas at malamig. So, kadalasan dyan nagtatanim sa mga malalamig na lugar. Pangalawa, mahirap puntahan itong mga areas na ito,” matod ni Mariano.

Legal

Samtang, ang Dangerous Drugs Board (DDB) nisugyot nga himuong legal ang paggamit sa marijuana isip tambal niadtong mga tawo nga adunay sakit sa patol nunot sa migawas nga pagtuon sa World Health Organization (WHO) nga makatambal kini sa mga tawo nga adunay sakit sa patol.

Uyon usab niini si Mariano, apan kinahanglan nga tun-an pag ayo sa gobyerno kon kinsa ang hatagan sa pagtugot nga makatanom sa marijuana aron di maabusohan.

“Doon sa mga nagpa-plant dapat malaman natin kung sino yung authorized na magtanim. Hindi pwede na lahat ay magtanim kung sino lang yung authorized ng Dangerous Drugs Board na magtanim,” matod ni Mariano.

Nipasalig hinuon si Mariano nga ang gobyerno adunay himuon nga precautionary measure aron di mahimong abusohan ang pagtanom sa marijuana kon aduna na unyay balaod sa paggamit niini alang sa pagtambal sa usa ka sakit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph