HUMAN makaplaging positibo sa poliovirus ang Butuanon River, adunay ipahigayon nga pagmonitor sa mga tawo nga anaa duol sa maong sapa.
Matod ni Department of Health (DOH) 7 Regional Director Jaime Bernadas sa usa ka press conference kuyog nila ni Cebu City Mayor Edgardo Labella ug Mandaue City Mayor Jonas Cortes, nga ilang sutaon diin ang tinubdan sa kagaw.
Usa sa ilang pagabuhaton mao ang pagsuroy sa lima ka kilometrong radius sa maong lugar aron masuta kon aduna bay apektado sa maong sakit.
“Monitoring sa mga bata below 15 years old. Tan-awon nato ang mga bata nga wala nakakompleto sa tulo ka dosage sa bakuna ug usa ka injectable polio o kon duna bay nagpakita og symptoma nya kuhaan kini og samples,” saysay ni Bernabas.
Ila usab nga ikampanya ang pagpabakuna alang sa injectable polio aron mahatagan og saktong proteksyon ang kabatan-onan.
Ang sapa naglagbas sa mga siyudad sa Sugbo ug Mandaue, lahos sa lungsod sa Consolacion.
Dugang ni Bernadas nga makatakod ang polio pinaagi sa babakon makakaon o makainom ang usa ka tawo og tubig nga kontamindo. Apan iyang giklaro nga dali ra mamatay ang virus kon kini makagawas na sa lawas sa tawo. (JCT)