BANGGIITANG mga tulisan gikan sa Ozamis City niabot na dinhi sa Sugbo aron manulis human ang dagkog balor sa shabu nga gipayuhot dinhi sa Sugbo nasakmit sa kapulisan.

Gumikan niini, ang pangulo sa Police Regional Office, Chief Supt. Lani-o Nerez, nimando sa iyang mga sakop nga magbantay.

Click here for Election 2010 updates

Si Nerez niingon nga nakadawat silag report nga maong grupo tuyong nianhi sa Sugbo ug posebling dinhi mohimo sa ilang illegal nga kalihukan.

Iya nang gimandoan ang iyang mga city director ug mga provincial director nga di mokompyansa.

Samtang hugtan pa ang ilang pagpahigayog mga checkpoint aron di makahimog binuang ang grupo.

Hinuon gitataw ni Nerez nga dugay nang andam ang iyang mga sakop ug iyang giawhag ang grupo nga di na lang mohimo pag mga binuang. Ilabi na kay ang publiko ingon man ang ilang mga force multiplier andam moabag kanila ug mo-report niadtong mga tawo nga kadudahan ang linihukan.

Wa isalikway ni Nerez ang poseblidad nga mopahimulos sa higayon ang mga tulisan sa umaabot nga Semana Santa.

Posebli nga gamiton ang ilang matulis sa paggasto sa kampanya niadtong mga politiko nga nagpaluyo kanila.“Diri sa ato wala ta anang klase sa pulitiko. Pero posebli sa uban duna na no,”asoy ni Nerez.

Ang tinubdan nibutyag nga niabot ang grupo tungod kay mohimo silag mga pagpanulis human nga ang ilang shabu nga gipasulod dinhi sa Sugbo pulos nasakmit sa kapulisan.

Sa iyang si Cebu Provincial Police Director Senior Supt. Erson Digal niingon nga gawas sa pagpa-alerto sa iyang mga sakop iya nang gipapahigayog mga checkpoint ang mga sakop sa Special Reaction Unit. (DRT)