ORMOC City, Leyte -Giinspeksyon ni Ormoc City Mayor Richard Gomez ang housing project sa National Housing Authority (NHA) alang sa mga biktima sa linog niadtong 2017.
Ang proyekto naa nahimutang sa 5.4 hektarya nga yuta sa Barangay Dolores nga iya sa lokal nga kagamhanan.
Sa iyang pag inspeksyon, nadismaya si Gomez sa dihang wa masunod ang sukod sa karsada nga iyang gusto.
“During meeting namin sinabi ko sa kanila na gusto kong kalsada ay 6.10 (meters). Ang ginawa nilang 6.10 ang main road lang, four plus (meters) lang interior,” matod ni Gomez.
Buot ni Gomez nga kon dunay emerhensya, di maglisud sa pagsulod ug paggawas ang emergency vehicles.
Gipadayag usab sa mayor nga di pwede sa iyaha ang “pwede na” ug “okay na yan” nga batasan kay buot niya nga dekalidad nga proyekto ang mahatag sa katawhan.
“Ang pera ng gobyerno ginagamit sa tamang paraan, di tinitipid. Gagawa ako ng tamang plano at ito gagastusin natin kasi every year magkakaroon ng pundo. Hindi ako naniniwala sa gobyerno na sinasabing may savings kami. Pag tinago mo yung pera, di mo ginastos, di mo ginagawa yung programa para sa tao,” dugang sa mayor.
Nidepensa ang NHA nga sa una pa nila gisugdan ang proyekto, ila usa gipakita sa city engineering ang plano ug gipirmahan kini sa departamento.
Buot usab ni Gomez nga dili iipon ang septic tank sa gikan sa lababo ug comfort rooms.
“Ayaw ko na isagol ang septic tank sa gikan sa lababo and CR. Dapat separate gyod ang ila septic tank,” matod ni Gomez.
Sa miaging 2018, nadismaya usab si Gomez sa NHA gumikan sa di maayong klase sa hollow blocks nga gigamit sa housing project sa Barangay Gaas.
Ang housing project sa Dolores o Highland 2 dunay 699 ka units, matag unit dunay lot area nga 50 square meters ug floor area nga 32.64 square meters.
Matag unit dunay balor nga P233,000.
Itakda na lang sa kagamhanan ug NHA ang turnover sa maong housing projects ngadto sa mga biktima sa linog gikan sa Barangays Tongonan, Lake Danao, Milagro ug Cabingtan.