POLICEWOMAN nga sakop sa Carcar Police Station nga wa mag-sul-ob og ensakto nga uniporme girelibuhan sa katungdanan.

Si Cebu Provincvial Police Director Senior Supt. Erson Digal nibisita sa Carcar Police Station kagahapon sa udto ug iyang naabtan si PO1 Eva Caminade sakop sa Police Community Relations Office.

Click here for Election 2010 updates

Ang maong pulis nagsul-ob sa ilang patrol shirt apan giparisan og maong nga karsones samtang nag-rubber shoes.

Sa dihang gipangutana ni Digal kon nganong mao kadto ang iyang uniporme igo lang kining nitubag nga mao kadto ang iyang uniporme.

Hinungdan nga si Digal nimando nga sugod karong adlawa relibuhan siya ug gibalhin sa provincial command.

“Adto (CPPO) siya didto aron makahibawo siya unya makat-on kon unsay proper uniform,”asoy ni Digal.

Iyang gipasabot nga aduna nay kamandoan ang Camp Crame sa ilang gitawag og Tamang Bihis kanilang mga pulis.

Di gyud mahimo nga ang ilang uniporme parisan og di ensakto.

Ang hepe nga si Supt. Renato Malazarte niingon nga wa siyay mahimo tungod kay mando man sa ilang labaw.

Apan siya nitataw nga wa siya magpabaya ug magkuwang sa iyang mga sakop pagpahimangno sa angay nilang buhaton ilabi na ang ilang proper uniform. Nibahad si Digal nga mao gihapon kini ang iyang buhaton paghimog mga kinalit-kalit nga pagbisita sa matag lungsod ug mosilot niadtong mga pulis nga badlungon. (DRT)