NASUGAKOD sa beteranong runner sa Sugbo nga si Dr. Potenciano “Yong” Larrazabal III ang grabe ka lisod nga tahas – ang pagdagan og pito ka sunodsunod nga full marathons sa pito ka mga kuntinente sulod sa pito ka mga adlaw.
Ang eye specialist nakakulit og kasaysayan ug nakahatag og dungog sa Sugbo dihang nahimo siyang labing unang Pinoy nga runner nga nakalampos sa World Marathon Challenge nga gipahigayon niadtong Pebrero 7-14, 2020.
Si Larrazabal, kinsa presidente ug chairman of the board sa Cebu Doctors Group of Hospitals, midagan og 294 ka mga kilometro sa kinatibuk-an sa iyang pagkompleto ning maong tahas. Ang USA KA full marathon gilangkuban og 42 ka mga kilometro.
Ang WMC nagsugod sa Cape Town, Africa niadtong Pebrero 7 unya gisundan kini sa grabe ka tugnaw nga Antartica niadtong Pebrero 8.
“The most challenging for me was in Antartica. It was freezing cold,” matod ni Larrazabal.
Gipasabot ni Larrazabal nga nangita siya’g mga pamaagi aron dili mokaging ang iyang mga tudlo gumikan sa tumang katugnaw. Gawas sa hand gloves nga iyang gisul-ob, iyaha sab nga iluklok ang iyang mga kamot sa baga nga jacket nga iyang gisul-ob atol sa iyang pagdagan sa Antartica.
“I’m glad I finished the Antartica leg because you can’t complete the challenge if you haven’t completed all seven. It was the most difficult,” dugang ni Larrazabal.
Ang nagsunod nga mga tipik sa WMC gipahigayon sa Perth, Australia niadtong Pebrero 9 dayon sa Dubai niadtong Pebrero 11 ug Madrid, Spain niadtong Pebrero 12. Ningpahuway ang mga partisipante niadtong Pebrero 10.
Sa katapusang duha ka bahin sa WMC, nakapakita na og maayong performance si Larrazabal.
Nahiluna siya sa ikalimang dapit sa Fortaleza, Brazil niadtong Pebrero 13 unya nahimutang siya sa ikaupat nga puwesto sa Miami niadtong Pebrero 14.
“I was getting stronger day by day peaking at the last leg and getting my best time,” pasabot ni Larrazabal.
Nakompleto ni Larrazabal kining maong tahas bisan aduna ra kini tulo ka mga oras sa pagkatulog kada human sa usa ka marathon.
“You need mental strength to complete this. It was never easy,” matod ni Larrazabal.
“I prepared for this race. I did my research. I plan to do this in 2021 but the organizers will do it every two years only. I did not want to do it in 2022, so I decide to make it a go this year.”
Gibutyag ni Larrazabal dihang pipila na lang ka mga metros ang gilay-on sa finish line, kahilakon na siya nga nagdagan.
Kini maoy ika-68 nga marathon nga gisalmutan ni Larrazabal ug wala pa siya’y plano nga moundang gumikan kay tinguha niyang paabton kini sa 100 ka marathons.
Sa iyang paghatag og dungog sa nasod, si Congressman Vincent Franco “Duke” Frasco mipasaka og House Resolution No. 720 nga maghatag og rekognasyon ug pahalipay ngadto kang Larrazabal ning makasaysayon niyang naabot.
“If you want to make history, you have to do historical things,” pag-qoute ni Larrazabal sa iyang paboritong atleta nga si anhing Kobe Bryant. (RSC, ESL)